ट्रम्प यांनी भारताला डिचवले, भारतावर 25 टक्के टॅरिफ तर पाकिस्तानसोबत केला तेल करार

ट्रम्प यांनी पाकिस्तानसोबत तेल करार केला आहे. भारतावर टॅरिफ लावला आहे. यावरुन अमेरिकेचे यापुढील धोरण स्पष्ट होत आहे. अमेरिकेला भारताकडून जास्त अपेक्षा असल्याचे दिसून येत आहे.

वॉशिंग्टन - अमेरिकेचे राष्ट्राध्यक्ष डोनाल्ड ट्रम्प यांनी बुधवारी जाहीर केले की, त्यांच्या प्रशासनाने पाकिस्तानसोबत एक मोठा तेल करार केला आहे, ज्या अंतर्गत दोन्ही देश इस्लामाबादमधील तेल साठ्याचा विकास एकत्रितपणे करणार आहेत. यावेळी त्यांनी म्हटले, की कदाचिक भविष्यात पाकिस्तान भारतालाही तेल पुरवठा करेल. एकिकडे भारतावर २५ टक्के टॅरिफ लावण्याची घोषणा करताना ट्रम्प यांनी पाकिस्तानसोबत तेल करार करुन भारताला डिचवल्याचे दिसून येत आहे.

Truth Social या सोशल मीडिया प्लॅटफॉर्मवर ट्रम्प यांनी लिहिले, "आम्ही पाकिस्तान या देशासोबत एक करार पूर्ण केला आहे, ज्यामध्ये अमेरिका आणि पाकिस्तान इस्लामाबादच्या प्रचंड तेल साठ्यांचा विकास एकत्रितपणे करतील."

या पोस्टमध्ये त्यांनी पुढे म्हटले, "या भागीदारीत पुढाकार घेणाऱ्या तेल कंपनीची निवड करण्याच्या प्रक्रियेत आम्ही आहोत. कोण जाणे, कदाचित एक दिवस पाकिस्तान भारतालाही तेल विकेल."

ट्रम्प यांची ही घोषणा भारतावर २५ टक्के आयात शुल्क लावल्याच्या काही तासांनंतर समोर आली. त्यांनी असेही म्हटले की, "रशियाकडून तेल व शस्त्रास्त्रे खरेदी केल्याबद्दल भारतावर एक मोठा दंड" लादला जाईल.

ट्रुथ सोशलवर पोस्ट करताना ट्रम्प म्हणाले, "भारतावरचे निर्बंध १ ऑगस्टपासून लागू होतील"

माजी अमेरिकन अध्यक्ष डोनाल्ड ट्रम्प यांनी Truth Social वर पोस्ट करताना जाहीर केले की, भारतावरील नवीन उपाय योजना १ ऑगस्टपासून लागू होतील. त्यांनी भारतावर टीका करताना म्हटले, “भारताने नेहमीच आपली बहुतांश लष्करी उपकरणे रशियाकडून खरेदी केली आहेत आणि सध्या जेव्हा संपूर्ण जग रशियाने युक्रेनमधील हिंसाचार थांबवावा अशी मागणी करत आहे, तेव्हा भारत आणि चीन हे रशियाचे सर्वात मोठे ऊर्जा खरेदीदार आहेत आणि हे काही चांगले संकेत नाहीत.”

पाकिस्तानसोबत घडत असलेल्या घडामोडींची पार्श्वभूमी

ट्रम्प यांची ही घोषणा अशा वेळी आली आहे, जेव्हा काही दिवसांपूर्वी अमेरिकेचे परराष्ट्रमंत्री मार्को रुबियो यांनी पाकिस्तानचे परराष्ट्रमंत्री इसहाक डार यांच्यासोबत अमेरिका येथे बैठक घेतली होती. या बैठकीनंतर इसहाक डार यांनी जाहीर केले की, "अमेरिकेसोबतचा व्यापार करार आता फार जवळ आला आहे." डार आणि रुबियो यांनी बैठकीत महत्त्वाच्या खनिजांवरील व्यापार व खाणकाम क्षेत्रातील सहकार्य वाढवण्यावर चर्चा केली. याशिवाय, गेल्या काही आठवड्यांत इतर पाकिस्तानी अधिकारीही अमेरिकेत व्यापारविषयक चर्चांसाठी गेले होते, असे Reuters ने नोंदवले आहे.

अमेरिका-पाकिस्तान व्यापाराचा आकडेवारीनुसार आढावा (2024)

US Trade Representative च्या संकेतस्थळानुसार, २०२४ मध्ये अमेरिका-पाकिस्तान यांच्यातील एकूण वस्तूंचा व्यापार $७.३ अब्ज इतका झाला आहे. २०२३ मध्ये हा व्यापार अंदाजे $६.९ अब्ज इतका होता. म्हणजेच, एका वर्षात व्यापारात वाढ झाली आहे. मात्र, याच काळात अमेरिकेची पाकिस्तानी वस्तूंची व्यापार तूट $३ अब्ज इतकी होती, जी २०२३ च्या तुलनेत ५.२% अधिक होती.