आता युद्धाला तोंड फुटणार..? इराण सीमेवर अमेरिकेची मोठी सैन्यतैनाती, लढाऊ विमाने-युद्धनौका सज्ज!

US Deploys Military Assets Near Iran Border : इराणवर दबाव टाकण्याचा एक भाग म्हणून अमेरिकेने या प्रदेशात अत्याधुनिक लढाऊ विमाने आणि युद्धनौका तैनात केल्या आहेत.

US Deploys Military Assets Near Iran Border : ट्रम्प यांच्या इशाऱ्यानंतर अमेरिकेने इराण सीमेवर लष्करी तैनाती वाढवली आहे. अमेरिकेने इराण सीमेवर 50 F-35, F-22 आणि F-16 विमाने तैनात केली आहेत. इराणसोबत जिनिव्हामध्ये अणुकरार चर्चा सुरू असतानाच अमेरिकेने पश्चिम आशियामध्ये मोठ्या प्रमाणात सैन्य तैनात केले आहे. इराणवर दबाव टाकण्याचा एक भाग म्हणून अमेरिकेने या प्रदेशात अत्याधुनिक लढाऊ विमाने आणि युद्धनौका तैनात केल्या आहेत.

अमेरिकेने या प्रदेशात सुमारे 50 F-35 लढाऊ विमाने, F-22 आणि F-16 सारखी अत्याधुनिक लढाऊ विमाने आणली आहेत. याशिवाय, C-17 विमानांद्वारे मोठ्या प्रमाणात लष्करी उपकरणे आणि क्षेपणास्त्र संरक्षण प्रणाली या प्रदेशात आणल्या जात आहेत. USS अब्राहम लिंकनसह अनेक युद्धनौका इराणजवळील सागरी हद्दीत तैनात आहेत. USS डेल्बर्ट डी. ब्लॅक नावाचे गाईडेड-मिसाईल डिस्ट्रॉयर जहाज इजिप्तच्या सुएझ कालव्यातून भूमध्य समुद्रातून लाल समुद्राकडे जात असल्याचे उपग्रह चित्रांमधून स्पष्ट झाले आहे. 

यूएस नेव्हीचे MQ-4C ट्रायटन टेहळणी ड्रोन आखातावर कार्यरत असल्याचे उपग्रह चित्रांमध्ये स्पष्ट दिसत आहे. चर्चा सुरू असली तरी, इराण करारासाठी तयार नसल्यास गंभीर परिणाम भोगावे लागतील, असा इशारा अमेरिकेचे अध्यक्ष डोनाल्ड ट्रम्प यांनी दिला आहे. एक सुंदर नौदल ताफा इराणच्या दिशेने सरकत असल्याचे डोनाल्ड ट्रम्प यांनी नुकतेच स्पष्ट केले होते. 

पेंटागॉन काही आठवडे टिकणाऱ्या जोरदार लष्करी कारवाईची तयारी करत असल्याचे आंतरराष्ट्रीय माध्यमांच्या वृत्तांवरून सूचित होते. मात्र, ट्रम्प यांच्या धमकीला प्रत्युत्तर देताना इराणचे सर्वोच्च नेते अयातुल्ला अली खामेनी यांनी अमेरिकेच्या युद्धनौका बुडवू, असे म्हटले आहे. याशिवाय, इराणने होर्मुझच्या सामुद्रधुनीमध्ये नौदल सरावही केला आहे.