Iran Nuclear Attack : इराणवर 'बंकर बस्टर' बॉम्ब हल्ला, अमेरिकेने अणुबॉम्बचा प्लॅन उधळला?

US and Israel Launch Bunker Buster Strike : अमेरिका आणि इस्रायलने मिळून इराणच्या इस्फहान शहरावर 'बंकर बस्टर' बॉम्बने हल्ला केला आहे. अणुबॉम्ब बनवण्यासाठी वापरला जाणारा युरेनियमचा साठा नष्ट करणं हा या हल्ल्याचा मुख्य उद्देश आहे. पण या हल्ल्यात युरेनियम साठ्याचं नुकसान झालं आहे की नाही, हे अजून स्पष्ट झालेलं नाही.

US and Israel Launch Bunker Buster Strike : इराणला कोणत्याही परिस्थितीत अणुबॉम्ब बनवण्यापासून रोखण्यासाठी अमेरिका आणि इस्रायलने एक मोठी कारवाई केली आहे. मंगळवारी सकाळी या दोन्ही देशांनी मिळून मध्य इराणमधील इस्फहान शहरावर 907 किलो वजनाच्या 'बंकर बस्टर' बॉम्बने हल्ला केला.

ज्या बंकरमध्ये अणुबॉम्बसाठी प्रक्रिया केलेलं युरेनियम साठवून ठेवलं असल्याचा संशय आहे, त्याच बंकरला लक्ष्य करून हा हल्ला करण्यात आला आहे. विशेष म्हणजे, अमेरिकेचे अध्यक्ष डोनाल्ड ट्रम्प यांनी स्वतः या हल्ल्याचे व्हिडिओ शेअर केले आहेत. मात्र, इराणने अद्याप या हल्ल्याला दुजोरा दिलेला नाही.

जमिनीच्या खूप खोलवर बनवलेल्या या बंकरमध्ये ठेवलेल्या युरेनियम साठ्याचं या हल्ल्यात काही नुकसान झालं आहे का, याबाबत कोणतीही माहिती समोर आलेली नाही. पण जर असं काही झालं असेल, तर किरणोत्सर्गी पदार्थ हवेत आणि पाण्यात मिसळून जगाला एका मोठ्या संकटाला सामोरं जावं लागू शकतं.

भीषण बॉम्ब हल्ला:

इराणच्या 3 प्रमुख अणुप्रकल्पांपैकी इस्फहान हे एक महत्त्वाचं केंद्र आहे. गेल्या वर्षीही अमेरिकेने यावर हल्ला केला होता. मंगळवारी सकाळी पुन्हा एकदा याच प्रकल्पाजवळच्या बंकरला लक्ष्य करण्यात आलं. अमेरिकेच्या म्हणण्यानुसार, इथे इराणचा शस्त्रसाठा होता आणि तो नष्ट करण्यासाठीच 'बंकर बस्टर' बॉम्ब हल्ला करण्यात आला. बॉम्बस्फोटानंतर तिथे एकापाठोपाठ एक अनेक स्फोट झाले आणि आगीचे मोठे लोळ आकाशात उसळले.

अमेरिकेला संशय का?

गेल्या वर्षी इस्फहान अणुप्रकल्पावर हल्ला करण्यापूर्वी अमेरिकेच्या सॅटेलाइटने काही फोटो काढले होते. त्यात 18 कंटेनरमधून प्रक्रिया केलेलं युरेनियम एका बोगद्यात नेलं जात असल्याचं दिसलं होतं. त्यामुळेच गेल्या वर्षी जून महिन्यात अमेरिकेने हल्ला केला होता. पण त्याचा फारसा परिणाम झाला नाही. आजही इराणकडे 400 किलो युरेनियम आहे, जे 60% पर्यंत शुद्ध (संस्करित) केलेलं आहे. हेच प्रमाण 90% पर्यंत पोहोचलं, तर ते अणुबॉम्ब बनवण्यासाठी वापरलं जाऊ शकतं. यातून इराण किमान 10 अणुबॉम्ब बनवू शकतो, अशी भीती अमेरिका आणि इस्रायलला आहे. याच कारणामुळे इराणकडील युरेनियम नष्ट करण्यासाठी किंवा ताब्यात घेण्यासाठी मंगळवारी हा हल्ला करण्यात आल्याचं बोललं जात आहे.