ब्रिटिश पंतप्रधानांच्या दिपावली मेजवानीत मांसाहार-दारू, हिंदू समाज नाराज

लंडन: ब्रिटिश पंतप्रधान केअर स्टारमर यांनी आयोजित केलेल्या दिपावली मेजवानीत मांसाहार आणि मद्य दिल्याने देशातील हिंदू समाजाने नाराजी व्यक्त केली आहे. पंतप्रधानांचे अधिकृत निवासस्थान असलेल्या १० डाउनिंग स्ट्रीटवर दिपावलीचा उत्सव आयोजित करण्यात आला होता. या उत्सवात समाजातील नेते आणि वरिष्ठ राजकीय नेते उपस्थित होते. दिव्यांची सजावट, कुचीपुडी नृत्य असे कला कार्यक्रमही सादर करण्यात आले. पंतप्रधान स्टारमर यांनी मेजवानीला संबोधित केले. पाहुण्यांना लॅम्ब कबाब, बिअर, वाईन देण्यात आले. जेवणाच्या मेनूमध्ये मद्य आणि मांसाहारी पदार्थ असल्याचे समजल्यावर काही ब्रिटिश हिंदूंनी नाराजी व्यक्त केली.

गेल्या वर्षी ऋषी सुनक यांनी दिपावलीचा उत्सव साजरा केला तेव्हा मांसाहार आणि मद्य वर्ज्य केले होते. प्रसिद्ध ब्रिटिश हिंदू पंडित सतीश के शर्मा यांनी पंतप्रधानांच्या कार्यालयावर टीका केली. गेल्या १४ वर्षांपासून डाउनिंग स्ट्रीटवर दिपावलीचा उत्सव मांसाहार आणि मद्यशिवाय साजरा केला जात होता. यावर्षीच्या उत्सवात मद्य आणि मांसाहार समाविष्ट केल्याने धक्का बसला आहे. पंतप्रधानांचे सल्लागार निष्काळजीपणे कार्यक्रम आयोजित केला आहे, असे त्यांनी एक्सवर पोस्ट केले. दरम्यान, पंतप्रधानांच्या कार्यालयाने अद्याप कोणतीही प्रतिक्रिया दिलेली नाही.