Trump On Ind Pak War : मी भारत-पाकिस्तानला 200 टक्के टॅरिफची भीती दाखवल्याने युद्ध थांबले, टॅम्प यांचा दावा!

Trump On Ind Pak War : डोनाल्ड ट्रम्प म्हणाले की त्यांनी भारत-पाकिस्तान वादासह अनेक युद्धे थांबवली. याशिवाय, हे सर्व त्यांनी नोबेल शांतता पुरस्कारासाठी केले नाही, असेही ते म्हणाले.

Trump On Ind Pak War : अमेरिकेचे राष्ट्राध्यक्ष डोनाल्ड ट्रम्प यांना यावेळीही नोबेल शांतता पुरस्कार मिळाला नाही, पण ते निराश झालेले नाहीत. त्यांनी जगातील अनेक युद्धे आणि वाद मिटवण्यात मदत केल्याचे म्हटले आहे. ट्रम्प यांनी पुन्हा एकदा दावा केला की, त्यांनी भारत आणि पाकिस्तानमधील युद्ध थांबवण्यात महत्त्वाची भूमिका बजावली. त्यांनी आतापर्यंत सात युद्धे थांबवली असल्याचे सांगितले. मात्र, हे सर्व नोबेल शांतता पुरस्कारासाठी केले नाही, असेही ट्रम्प यांनी स्पष्ट केले. इजिप्तला जाताना गाझा शांतता चर्चेदरम्यान त्यांनी एअर फोर्स वनवर पत्रकारांशी संवाद साधला.

भारत-पाक युद्ध थांबवण्याचे पुन्हा श्रेय घेतले

डोनाल्ड ट्रम्प म्हणाले की, त्यांनी काही वाद असे सोडवले ज्यात त्यांनी टॅरिफचा (आयात शुल्क) उल्लेख केला. उदाहरण देताना त्यांनी सांगितले की, जेव्हा भारत आणि पाकिस्तानमध्ये संघर्ष झाला, तेव्हा ते म्हणाले की, 'जर तुम्ही लोकांनी युद्ध केले तर मी तुमच्यावर 100%, 150% किंवा 200% टॅरिफ लावेन.' यानंतर 24 तासांतच प्रकरण मिटले. ट्रम्प यांचे म्हणणे आहे की, जर त्यांच्यावर हा टॅरिफचा दबाव नसता, तर कदाचित ते युद्ध थांबवता आले नसते.

"मी आतापर्यंत सात शांतता करार केले आहेत"

9 ऑक्टोबर रोजी डोनाल्ड ट्रम्प यांनी फॉक्स न्यूजला दिलेल्या मुलाखतीत सांगितले होते की, त्यांनी युद्धखोर देशांमध्ये शांतता प्रस्थापित करण्यासाठी टॅरिफ लावण्याची रणनीती वापरली. जेव्हा त्यांना विचारले गेले की त्यांनी देशांना चर्चेसाठी कसे तयार केले, तेव्हा ते म्हणाले, "टॅरिफ लावण्याच्या क्षमतेमुळे जगात शांतता निर्माण झाली. मी आतापर्यंत सात शांतता करार केले आहेत." ट्रम्प यांनी सांगितले की, अनेक देश दीर्घकाळापासून लढत होते आणि त्यामुळे त्यांचे मोठे नुकसान झाले. नोबेल शांतता पुरस्कार जिंकणे हे आपले उद्दिष्ट नसल्याचे त्यांनी स्पष्ट केले. ट्रम्प म्हणाले, "मी हे फक्त सन्मानासाठी करतो. मी 2025 मध्ये अनेक महत्त्वाची कामे केली, पण ती नोबेलसाठी नव्हे, तर लोकांचे प्राण वाचवण्यासाठी केली." तथापि, भारताने सातत्याने स्पष्ट केले आहे की ऑपरेशन सिंदूर आणि त्यानंतरच्या युद्धविरामात अमेरिकेची कोणतीही भूमिका नव्हती.