Thailand Tigers : थायलंडमध्ये 72 वाघांचा मृत्यू, फोटोजेनिक वाघच दगावल्याने पर्यटकांची नाराजी!

Thailand Tigers : थायलंडला जाणाऱ्या पर्यटकांसाठी वाघ हे मोठं आकर्षण आहे. पण ज्या वाघांना पर्यटक हात लावू शकत होते, त्यांच्यासोबत फोटो काढू शकत होते, अशा ७२ वाघांचा एका खतरनाक व्हायरसमुळे मृत्यू झाला आहे. 

चियांग माईमधील टायगर पार्क

थायलंडमधील प्रसिद्ध पर्यटनस्थळ असलेल्या चियांग माईमधील एका टायगर पार्कमध्ये ही घटना घडली. ८ ते १८ फेब्रुवारी दरम्यान पार्काच्या दोन शाखांमध्ये मिळून ७२ वाघांचा मृत्यू झाला. यातले बहुतेक बछडे दोन आठवड्यांपेक्षा कमी वयाचे होते. प्रशासनाने या प्रकरणी चौकशी सुरू केली आहे.

पर्यटकांचे खास आकर्षण

या पार्कमध्ये पर्यटक वाघांना हात लावू शकत होते आणि त्यांच्यासोबत फोटोही काढू शकत होते. 'टायगर किंगडम चियांग माई' (Tiger Kingdom Chiang Mai) या नावाने हे वाघ ओळखले जात. या पार्काच्या दोन केंद्रांमध्ये २४० पेक्षा जास्त वाघ होते.

मृत्यूचं कारण 'कॅनाइन डिस्टेंपर'

पशुसंवर्धन अधिकाऱ्यांनी केलेल्या तपासणीत 'कॅनाइन डिस्टेंपर व्हायरस' (Canine Distemper Virus) मुळे वाघांचा मृत्यू झाल्याचं समोर आलं. नमुन्यांमध्ये फुफ्फुसाच्या आजारांना कारणीभूत ठरणाऱ्या बॅक्टेरियाचा अंशही आढळला.

माणसांना धोका नाही!

हा आजार माणसांमध्ये पसरत नाही, त्यामुळे पर्यटकांनी घाबरण्याची गरज नाही, असं अधिकाऱ्यांनी मंगळवारी पत्रकार परिषदेत स्पष्ट केलं. या आजाराचा प्रसार कसा झाला, हे मात्र अजून निश्चित झालेलं नाही.

आजारावर नियंत्रण मिळवलं

अधिकाऱ्यांनी सांगितलं की, आता व्हायरसचा प्रसार थांबला आहे आणि परिस्थिती नियंत्रणात आहे. नवीन मृत्यूची नोंद नाही. मृत वाघांचे अवशेष पूर्णपणे पुरण्यात आले आहेत. गंभीर आजारी वाघांना दयामरण देण्याची शिफारस केली आहे.

काय आहे कॅनाइन डिस्टेंपर?

कॅनाइन डिस्टेंपर हा वेगाने पसरणारा एक जीवघेणा आजार आहे. हा विषाणू प्राण्यांच्या श्वसन, पचन आणि मज्जासंस्थेवर हल्ला करतो. सामान्यतः हा आजार कुत्र्यांमध्ये आढळतो, पण वाघ आणि सिंहांनाही याची लागण होऊ शकते.

दूषित चिकनमुळे संसर्ग?

बँकॉक पोस्टच्या वृत्तानुसार, वाघांना दिलेल्या दूषित चिकनमधून हा आजार पसरल्याचा संशय आहे. २००४ मध्ये चोनबुरी प्रांतातील एका टायगर झूमध्ये बर्ड फ्लू पसरण्यामागेही कच्चे चिकन हेच कारण असल्याचा संशय होता. तेव्हा सुमारे १५० वाघ मरण पावले होते.

पार्क तात्पुरते बंद

रोग नियंत्रण विभागाने (Disease Control Department) सांगितलं की, केंद्रातील डॉक्टर किंवा कर्मचाऱ्यांना संसर्ग झालेला नाही. तरीही, खबरदारी म्हणून त्यांना २१ दिवस निरीक्षणाखाली ठेवलं आहे. 'टायगर किंगडम चियांग माई' पार्क सध्या दोन आठवड्यांसाठी बंद आहे.

चिंतेचं कारण नाही - अधिकारी

वाघांचा मृत्यू बर्ड फ्लूमुळे झालेला नाही आणि हा विषाणू माणसांना संक्रमित करत नाही, त्यामुळे जास्त काळजी करण्याची गरज नाही, असं अधिकाऱ्यांनी स्पष्ट केलं. प्राण्यांकडून माणसात संसर्ग झाल्याची एकही केस नाही, असं सार्वजनिक आरोग्य मंत्र्यांनी सांगितलं.