भारतीय प्रवाशांसाठी रशियात व्हिसा-मुक्त प्रवेश

मॉस्को: भारतीयांसाठी एक आनंदाची बातमी. जगातील सर्वात मोठ्या देशांपैकी एक असलेल्या रशियामध्ये भारतीयांना लवकरच व्हिसाशिवाय प्रवास करता येईल अशी अपेक्षा आहे.

२०२५ मध्ये भारतीयांना रशियामध्ये व्हिसाशिवाय प्रवास करता येईल, असे वृत्त आहे. जूनमध्ये भारत आणि रशियाने व्हिसा प्रक्रिया सुलभ करण्यासाठी द्विपक्षीय करारावर चर्चा केली होती. व्हिसाशिवाय प्रवास शक्य करणे हा मुख्य उद्देश होता. ऑगस्ट २०२३ पासून भारतीयांना रशियाला प्रवास करण्यासाठी ई-व्हिसा सुविधा उपलब्ध झाली आहे. ई-व्हिसा प्रक्रिया पूर्ण होण्यासाठी चार दिवस लागतात. गेल्या वर्षी सर्वाधिक ई-व्हिसा मिळालेल्या पाच देशांमध्ये भारत होता. भारतीयांना ९,५०० ई-व्हिसा देण्यात आले.

सध्या भारतीयांना रशियामध्ये प्रवेश करण्यासाठी, राहण्यासाठी आणि रशियन फेडरेशनमधून बाहेर पडण्यासाठी रशियन दूतावास किंवा वाणिज्य दूतावास कडून व्हिसाची आवश्यकता असते. व्यवसाय आणि अधिकृत कामांसाठी बहुतेक भारतीय रशियाला प्रवास करतात. २०२३ मध्ये ६०,००० भारतीय मॉस्कोला भेट दिली. २०२२ च्या तुलनेत ही संख्या २६ टक्क्यांनी जास्त आहे. सध्या व्हिसा-मुक्त पर्यटन देवाणघेवाण योजनेअंतर्गत चीन आणि इराणमधील प्रवाशांना रशियामध्ये व्हिसाशिवाय प्रवास करण्याची परवानगी आहे. ही योजना मॉस्कोसाठी फायदेशीर ठरत असल्याने, भारतीयांसाठीही अशीच व्यवस्था केली जाईल अशी अपेक्षा आहे.