युद्धबंदी की बनावटपणा! पाकिस्तानच्या शिष्टाईनंतर ट्रम्प नरमले, इराणसोबत दोन आठवड्यांची युद्धबंदी जाहीर

Pakistan made Two Week US Iran Ceasefire Averting War : पाकिस्तानच्या मध्यस्थीनंतर अमेरिकेचे अध्यक्ष डोनाल्ड ट्रम्प यांनी इराणसोबत दोन आठवड्यांसाठी युद्धविराम जाहीर केला आहे. यामुळे पश्चिम आशियातील युद्धाचं सावट तूर्तास टळलं आहे.

Pakistan made Two Week US Iran Ceasefire Averting War : पाकिस्तानने केलेली विनंती अखेर डोनाल्ड ट्रम्प यांनी मान्य केली आहे. पाकिस्तानचे पंतप्रधान शेहबाज शरीफ यांनी इराणविरुद्धची अंतिम मुदत दोन आठवड्यांनी वाढवण्याची मागणी केली होती. यानंतर, मंगळवारी डोनाल्ड ट्रम्प यांनी स्वतः सोशल मीडियावर पोस्ट करून इराणसोबत दोन आठवड्यांच्या युद्धविरामास (ceasefire) सहमती दर्शवली. 'मी इराणवरील बॉम्बहल्ले आणि इतर लष्करी कारवाया दोन आठवड्यांसाठी थांबवण्यास सहमत आहे,' असं ट्रम्प यांनी आपल्या पोस्टमध्ये म्हटलं आहे.

ही एक द्विपक्षीय युद्धबंदी असेल, असंही त्यांनी स्पष्ट केलं. अमेरिकेची लष्करी उद्दिष्टं यशस्वीपणे पूर्ण झाली असून, इराणसोबत शांतता कराराच्या चर्चेत चांगली प्रगती होत असल्याचंही ट्रम्प यांनी नमूद केलं. दोन्ही देशांमधील बहुतेक वादग्रस्त मुद्द्यांवर एकमत झाल्याचा दावाही त्यांनी केला. पाकिस्तानचे पंतप्रधान शेहबाज शरीफ आणि फिल्ड मार्शल असीम मुनीर यांच्याशी झालेल्या चर्चेनंतर हा निर्णय घेतल्याचं ट्रम्प यांनी सांगितलं.

मात्र, या युद्धबंदीसाठी ट्रम्प यांनी एक मोठी अट घातली आहे. इराणने होर्मुझची सामुद्रधुनी (Strait of Hormuz) तात्काळ आणि पूर्णपणे वाहतुकीसाठी सुरक्षित करावी, असं त्यांनी स्पष्ट केलं आहे. विशेष म्हणजे, ट्रम्प यांनी स्वतःच हल्ल्यासाठी दिलेली रात्री ८ वाजताची डेडलाईन संपायला फक्त एक तास शिल्लक असताना ही घोषणा करण्यात आली. पश्चिम आशियावर युद्धाचे ढग जमले असताना आलेल्या या बातमीमुळे संपूर्ण जगाने सुटकेचा निःश्वास सोडला आहे. अमेरिका, इस्रायल आणि इराण यांच्यातील या तणावात पाकिस्तान मध्यस्थाची भूमिका बजावत आहे. या यशस्वी चर्चेत सहभागी असलेल्या व्यक्तींमध्ये पाकिस्तानचे पंतप्रधान शेहबाज शरीफ यांचं नाव ट्रम्प यांनी विशेषत्वाने घेतलं.

व्हाईट हाऊसच्या प्रवक्त्याने सीएनएनला (CNN) दिलेल्या माहितीत एका मोठ्या गोष्टीला दुजोरा दिला आहे. या दोन आठवड्यांच्या युद्धविरामात इस्रायलचाही समावेश आहे. होर्मुझची सामुद्रधुनी खुली न केल्यास इराणच्या पायाभूत सुविधांवर मोठा लष्करी हल्ला करण्याची धमकी ट्रम्प यांनी दिली होती. ही मुदत संपायला अवघा दीड तास बाकी असताना ही माहिती समोर आली. चर्चेचं वातावरण कायम राहावं यासाठी इस्रायलनेही आपले बॉम्बहल्ले तात्पुरते थांबवण्यास सहमती दर्शवली आहे, असं या अधिकाऱ्याने स्पष्ट केलं.