Pakistan Fuel Price Hike : पाकिस्तानात इंधन दरांचा स्फोट! हाय-ऑक्टेन पेट्रोलवर तब्बल 200% कर वाढ, महागाईचा फटका तीव्र

Pakistan Fuel Price Hike : पाकिस्तानमध्ये हाय-ऑक्टेन इंधनावरील कर 100 वरून 300 रुपयांपर्यंत वाढवण्यात आला आहे. जागतिक तणाव आणि तेलाच्या किमती वाढल्यामुळे हा निर्णय घेण्यात आला असून याचा अर्थव्यवस्थेवर परिणाम होण्याची शक्यता आहे.

Pakistan Fuel Price Hike : जागतिक ऊर्जा संकटाच्या पार्श्वभूमीवर पाकिस्तान सरकारने मोठा निर्णय घेतला आहे. हाय-ऑक्टेन इंधनावरील करात तब्बल 200 टक्क्यांची वाढ करण्यात आली असून, यामुळे देशातील इंधन दरात मोठी वाढ झाली आहे. या निर्णयाला पंतप्रधान शहबाज शरीफ यांनी मंजुरी दिली आहे.

हाय-ऑक्टेन इंधनावर मोठा कर वाढ

सरकारने हाय-ऑक्टेन इंधनावरील कर 100 पाकिस्तानी रुपयांवरून थेट 300 रुपयांपर्यंत वाढवला आहे. हा इंधन प्रकार मुख्यतः आलिशान वाहनांमध्ये वापरला जातो. या निर्णयामुळे उच्चवर्गीय वाहनधारकांवर अधिक आर्थिक भार पडणार आहे.

जागतिक तणावाचा परिणाम

इराण-इस्राइलमधील युद्ध  यामुळे जागतिक तेल किमतीत वाढ झाली आहे. विशेषतः होर्मुझच्या सामुद्रधुनीतील तणावामुळे ऊर्जा पुरवठ्यावर परिणाम झाला आहे. यामुळे पाकिस्तानसारख्या देशांवर आर्थिक दबाव वाढला आहे.

पेट्रोल-डिझेल दरातही वाढ

यापूर्वीच 6 मार्च रोजी सरकारने पेट्रोल आणि डिझेलच्या दरात प्रति लिटर 55 पाकिस्तानी रुपयांची वाढ केली होती. नव्या दरानुसार पेट्रोल 266.17 वरून 321.17 रुपयांपर्यंत, तर डिझेल 280.86 वरून 335.86 रुपयांपर्यंत वाढले आहे.

वाहतूक आणि विमान भाड्यावर परिणाम

अहवालानुसार, हाय-ऑक्टेन दरवाढीचा थेट परिणाम सार्वजनिक वाहतूक आणि विमान प्रवासावर होणार नाही. मात्र, जेट इंधनाच्या किमती वाढल्याने विमान कंपन्यांनी आधीच भाडेवाढ केली आहे. देशांतर्गत आणि आंतरराष्ट्रीय विमान तिकिटांच्या दरात मोठी वाढ झाली आहे.

उच्चस्तरीय बैठकीत निर्णय

हा निर्णय पंतप्रधानांच्या अध्यक्षतेखाली झालेल्या बैठकीत घेण्यात आला. या बैठकीला मुहम्मद औरंगजेब, आझम नजीर तरार, अत्ताउल्ला तरार आणि अली परवेझ मलिक यांच्यासह वरिष्ठ अधिकारी उपस्थित होते.