Nepal Floods : नेपाळमध्ये महाप्रलय, ७८८ मृत्यू; कैलास यात्रेतून परतला भाविक म्हणाला, 'उशीर झाला म्हणून वाचलो!'

Nepal Flood Kailash Yatra : नेपाळमधील पुरामुळे आतापर्यंत ७८८ लोकांचा मृत्यू झाला आहे. या सगळ्यात कैलास मानसरोवर यात्रेतून सुखरूप परतलेल्या रुचित गोयल यांनी आपला अनुभव सांगितला आहे. ते म्हणाले की, प्रवासाला उशीर झाल्यामुळे त्यांचा ग्रुप वाचला.

काठमांडू : नेपाळमधील पुरामुळे मृतांचा आकडा ७८८ वर पोहोचला आहे. हिमालयीन राष्ट्र परिस्थिती पूर्वपदावर आणण्यासाठी युद्धपातळीवर काम करत आहे. पण, या दुःखाच्या कहाण्यांमध्ये आशेचे किरणही दिसत आहेत.

एका भाविकाची सुटकेची कहाणी

रुचित गोयल हे त्यापैकीच एक भाग्यवान भाविक आहेत, जे कैलास मानसरोवर यात्रेला गेले होते आणि या भीषण परिस्थितीतही सुखरूप परतले. 'एएनआय'शी बोलताना गोयल यांनी आपला अनुभव सांगितला. ते म्हणाले, "आम्ही १८ तारखेला कैलास पर्वताच्या यात्रेसाठी नेपाळला पोहोचलो. बाबांच्या कृपेने यात्रा यशस्वी झाली आणि तिथला अनुभव एका वेगळ्याच अद्भुत ऊर्जेने भरलेला होता."

त्यांनी सांगितलं की त्यांच्या ग्रुपमध्ये २१ जण होते, पण तिथे पोहोचल्यावर मेडिकल टेस्टनंतर फक्त २० जणांनाच पुढे जाण्यासाठी निवडण्यात आलं. "आमच्या ग्रुपमध्ये २१ लोक होते आणि आम्ही एकमेकांच्या संपर्कात होतो. पण तिथे पोहोचल्यावर एक मेडिकल टेस्ट होते, त्यामुळे २१ पैकी फक्त २० जणांनाच पुढे जाण्याची परवानगी मिळाली," असं ते म्हणाले.

ज्या इमिग्रेशन सेंटरवर ही दुर्घटना घडली, ते ठिकाण त्यांच्या जागेपासून सुमारे ७००-८०० किलोमीटर दूर होतं, असं गोयल यांनी सांगितलं. "जिथे ही घटना घडली, ते इमिग्रेशन सेंटर आमच्या ठिकाणापासून जवळपास ७००-८०० किलोमीटर लांब आहे. पण ही देवाचीच कृपा म्हणा किंवा बाबांचा आशीर्वाद म्हणा, की आमच्या प्रवासाला उशीर झाला; नाहीतर २६ तारखेला आम्ही सुद्धा त्याच इमिग्रेशन सेंटरवर असतो," असं त्यांनी सांगितलं.

तामिळनाडूचे ४९ पर्यटक बेपत्ता

दरम्यान, कैलास मानसरोवर यात्रेला गेलेले तामिळनाडूचे ४९ पर्यटक अचानक आलेल्या पुरानंतर बेपत्ता झाले आहेत. त्यांच्या कुटुंबीयांनी केंद्र सरकारकडे या बेपत्ता भाविकांना शोधण्यासाठी मदत करण्याची विनंती केली आहे. चेन्नईतील क्रोमपेट येथील 'महादेव कैलास टुरिस्ट एजन्सी'चे मालक सत्य नारायणन यांच्या नेतृत्वाखाली हा ४९ जणांचा ग्रुप १४ ऑगस्टला चेन्नईहून काठमांडूमार्गे यात्रेसाठी निघाला होता. कुटुंबीयांच्या म्हणण्यानुसार, २६ ऑगस्टच्या सकाळी जेव्हा या भागात अचानक पूर आला, तेव्हा हा ग्रुप इमिग्रेशन बिल्डिंगमध्ये होता.

बचाव आणि मदतकार्य सुरू

२६ ऑगस्टला हिमनदी कोसळल्यामुळे आलेला विनाशकारी पूर आणि भूस्खलनामुळे नेपाळ आणि लगतच्या तिबेटमध्ये, विशेषतः भोटे कोशी आणि त्रिशूली नदीच्या खोऱ्यात, मोठी मानवी आणीबाणी निर्माण झाली आहे. परिस्थिती अजूनही गंभीर असून, अत्यंत कठीण भूभाग आणि हवामानात बचाव, मदत आणि ओळख पटवण्याचं काम सुरू आहे. नेपाळमधील या विनाशकारी पुरातून आतापर्यंत ७८८ मृतदेह बाहेर काढण्यात आले आहेत.