Iran-US: मोजतबा खमेनींचा अमेरिकेला इशारा: 'मध्यपूर्वेतील लष्करी तळ बंद करा'

Mojtaba Khamenei Warns US to Shut Middle East Bases in First Statement as Iran Supreme Leader: इराणचे नवे सुप्रीम लीडर मोजतबा खामेनेई यांनी आपल्या पहिल्याच वक्तव्यात अमेरिकेला थेट इशारा दिला आहे. मिडिल ईस्टमधील अमेरिकेचे लष्करी तळ बंद करा, अन्यथा हल्ले सुरूच राहतील, असं ते म्हणाले. तसंच, होर्मुझची सामुद्रधुनी उघडण्यासही त्यांनी नकार दिला आहे.

Iran-US War Latest News: इराणच्या सुप्रीम लीडर पदाची सूत्रं हाती घेतल्यानंतर मोजतबा खामेनेई यांनी पहिलंच निवेदन जारी केलं आहे. यात त्यांनी अमेरिकेला कडक शब्दांत इशारा दिला आहे. मिडिल-ईस्टमधील अमेरिकेचे लष्करी तळ बंद करा, नाहीतर या तळांवर हल्ले सुरूच राहतील, अशी थेट धमकी त्यांनी दिली आहे.

मिडिल ईस्टमध्ये अमेरिकेच्या लष्करी तळांवरून इशारा

इराणच्या सरकारी टीव्हीवर त्यांचं निवेदन वाचून दाखवण्यात आलं. यानुसार, या भागात तणाव वाढण्याचं सर्वात मोठं कारण म्हणजे अमेरिकेची लष्करी उपस्थिती आहे, असं खामेनेई यांनी म्हटलं आहे. जर अमेरिकेने आपले लष्करी तळ बंद केले नाहीत, तर त्यांच्यावर हल्ले सुरूच राहतील, असं त्यांनी स्पष्ट केलं.

होर्मुझची सामुद्रधुनी उघडण्यास नकार

सध्याच्या परिस्थितीत होर्मुझची सामुद्रधुनी (Strait of Hormuz) पुन्हा उघडली जाणार नाही, असंही खामेनेई यांनी आपल्या निवेदनात स्पष्ट केलं आहे. होर्मुझची सामुद्रधुनी ही जगातील सर्वात महत्त्वाच्या सागरी व्यापारी मार्गांपैकी एक आहे. येथून मोठ्या प्रमाणात जागतिक तेल पुरवठा होतो.

सरकारी टीव्हीवर वाचून दाखवला संदेश

सुप्रीम लीडर बनल्यानंतर मोजतबा खामेनेई यांचा हा पहिलाच सार्वजनिक संदेश आहे. विशेष म्हणजे, त्यांनी स्वतः समोर येऊन हे वक्तव्य केलेलं नाही, तर इराणच्या सरकारी टीव्ही चॅनलवर एका निवेदकाने ते वाचून दाखवलं.

अमेरिका-इस्रायल आणि इराणमध्ये वाढता संघर्ष

खामेनेई यांचं हे वक्तव्य अशा वेळी आलं आहे, जेव्हा इस्रायल, अमेरिका आणि इराण यांच्यातील संघर्ष अधिकच तीव्र झाला आहे. गेल्या काही दिवसांपासून मिडिल ईस्टमध्ये अनेक लष्करी हल्ले झाले आहेत, ज्यामुळे या भागात तणाव प्रचंड वाढला आहे.

हल्ल्यात जखमी झाले होते मोजतबा खामेनेई

रिपोर्ट्सनुसार, अमेरिका आणि इस्रायलच्या हल्ल्यांच्या पहिल्याच दिवशी मोजतबा खामेनेई जखमी झाले होते. त्यांच्या पायाला फ्रॅक्चर झालं असून त्यांना किरकोळ दुखापतही झाली होती, असं सांगण्यात येतं. ज्या हवाई हल्ल्यात त्यांचे वडील आणि इराणचे माजी सुप्रीम लीडर अली खामेनेई यांचा मृत्यू झाला, त्याच हल्ल्यात मोजतबा जखमी झाल्याचं म्हटलं जात आहे. या घटनेनंतरच इराणच्या सर्वोच्च नेतृत्वात बदल झाला आणि मोजतबा खामेनेई यांना नवीन सुप्रीम लीडर बनवण्यात आलं.