''पत्नी उषाने ख्रिस्ती धर्म स्वीकारावा,'' अमेरिकेचे उपाध्यक्ष जे. डी. व्हान्स यांनी सर्वांसमोर व्यक्त केली मनातील इच्छा!

JD Vance : अमेरिकेचे उपाध्यक्ष जे.डी. व्हान्स यांनी म्हटले आहे की, त्यांची हिंदू पत्नी उषा व्हान्स यांनी एके दिवशी ख्रिस्ती धर्म स्वीकारावा अशी त्यांची इच्छा आहे. तथापि, आपण तिच्या विश्वासाचा आदर करतो, असेही त्यांनी स्पष्ट केले.

JD Vance : अमेरिकेचे राष्ट्राध्यक्ष डोनाल्ड ट्रम्प यांनी जे.डी. व्हान्स अमेरिकेचे राष्ट्रपती पदाचे उमेदवार राहू शकतात, असे वक्तव्य केले होते. त्यानंतर व्हान्स यांनीही या पदासाठी आपण तयार असल्याचे सांगितले होते. आता त्यांच्या या नवीन वक्तव्याने त्यांनी या पदाच्या दिशेने वाटचाल सुरु केल्याचे दिसून येत आहे. जे.डी. व्हान्स यांनी म्हटले आहे की, हिंदू संस्कृतीत वाढलेली त्यांची पत्नी उषा व्हान्स यांनी एके दिवशी ख्रिस्ती धर्म स्वीकारावा अशी त्यांची इच्छा आहे. मिसिसिपीमध्ये बुधवारी झालेल्या 'टर्निंग पॉईंट युएसए' कार्यक्रमात बोलताना त्यांनी हे मत उघडपणे मांडले.

पत्नीने धर्म बदलावा

उषा व्हान्स कधी 'ख्रिस्ताकडे वळतील का?' या प्रश्नाला उत्तर देताना जे. डी. व्हान्स म्हणाले, 'बहुतेक रविवारी उषा माझ्यासोबत चर्चमध्ये येते. मी चर्चमध्ये ज्या गोष्टीने आकर्षित झालो, त्याच गोष्टीने तिनेही एके दिवशी आकर्षित व्हावे, अशी माझी मनापासून इच्छा आहे. कारण माझा ख्रिस्ती धर्मावर विश्वास आहे. मला आशा आहे की माझी पत्नीही एके दिवशी ते सत्य ओळखेल.'

तरीही, त्यांच्या पत्नीच्या हिंदू श्रद्धेमुळे आपल्याला कोणतीही अडचण नाही, असेही त्यांनी नमूद केले. 'देवाने प्रत्येकाला स्वतंत्र इच्छा दिली आहे. त्यामुळे तिने धर्म नाही बदलला तरी मला काही अडचण नाही. तुम्ही ज्या व्यक्तीवर प्रेम करता, मित्र आणि कुटुंबासोबत राहण्यासाठी ही समज आवश्यक आहे,' असे व्हान्स म्हणाले.

कॅथोलिक धर्म स्वीकारलेले जे. डी. व्हान्स

अमेरिकेच्या रिपब्लिकन पक्षाचे सदस्य असलेले जे. डी. व्हान्स यांनी २०१९ मध्ये कॅथोलिक धर्म स्वीकारला. पण, जेव्हा ते आपल्या पत्नीला पहिल्यांदा भेटले, तेव्हा ते स्वतःला नास्तिक मानत होते. तरीही, व्हान्स दाम्पत्याची मुले ख्रिश्चन धर्माच्या पद्धतीनुसार वाढवली जात आहेत आणि ती एका ख्रिश्चन शाळेत शिकतात.

धर्मनिरपेक्षतेबद्दल विचारलेल्या प्रश्नाला उत्तर देताना जे. डी. व्हान्स म्हणाले, 'ख्रिश्चन धर्माची मूल्ये या देशाचा महत्त्वाचा पाया आहेत, असे मी मानतो. हे सांगायला मला कोणताही संकोच वाटत नाही. या देशाचा ख्रिश्चन पाया ही एक चांगली गोष्ट आहे, हे मी प्रामाणिकपणे सांगतो.'

भारतीयांविरोधातील वाढता द्वेष

दरम्यान, अमेरिकेत भारतीयांना मोठ्या प्रमाणात मिळणाऱ्या एच-१बी व्हिसाबाबत चर्चा वाढत असताना, भारतीयांविरुद्ध वंशद्वेष आणि द्वेषपूर्ण भाषणे, तसेच भारतीयांना देशाबाहेर काढण्याची मागणीही वाढत आहे.

अमेरिकन काँग्रेसवर निवडून आलेल्या पहिल्या हिंदू आणि राष्ट्रीय गुप्तचर विभागाच्या माजी संचालक तुलसी गबार्ड यांनी 'एक्स' सोशल मीडियावर दिवाळीच्या शुभेच्छा पोस्ट केल्यानंतर, अनेक अमेरिकन नागरिकांनी त्यांना विरोध केला. 'दिवाळी साजरी करणे ही अमेरिकन संस्कृती नाही. भारतात परत जा' आणि 'आमचा देश सोडून जा' अशा द्वेषपूर्ण कमेंट्स त्यांनी पोस्ट केल्या.

एफबीआय (FBI) चे माजी संचालक काश पटेल यांनाही त्यांच्या दिवाळी पोस्टवर अशाच विरोधाचा सामना करावा लागला. 'येशूचा मार्ग शोधा. तोच सत्य आहे, तोच प्रकाश आहे,' असे एका वापरकर्त्याने लिहिले. तर दुसऱ्याने, 'पश्चात्ताप करा आणि प्रभू येशू ख्रिस्तावर विश्वास ठेवा,' असे म्हटले.