Iran Israel War Marathi : क्षेपणास्त्र हल्ल्यानंतर इस्रायलचे पंतप्रधान नेतान्याहूंची पंतप्रधान मोदींशी चर्चा

इस्त्रायलचे पंतप्रधान नेतान्याहू यांनी इराणसोबतच्या वाढत्या तणावाबाबत पंतप्रधान मोदींशी फोनवरून चर्चा केली. मोदींनी आपल्या इंस्टाग्राम पोस्टमध्ये, नेतान्याहूंनी इराणमधील परिस्थितीबद्दल माहिती दिल्याचे लिहिले आहे. 

नवी दिल्ली : इस्त्रायलचे पंतप्रधान बेंजामिन नेतान्याहू यांनी भारताचे पंतप्रधान नरेंद्र मोदी यांच्याशी फोनवरून चर्चा करून इराणसोबतच्या वाढत्या तणावाबाबत माहिती दिली. पंतप्रधान मोदींनी आपल्या इंस्टाग्राम पोस्टमध्ये, नेतान्याहूंनी इराणमधील परिस्थितीबद्दल माहिती दिल्याचे लिहिले आहे. मी भारताच्या चिंता व्यक्त केल्या आणि या क्षेत्रात शांतता आणि स्थैर्य लवकरात लवकर प्रस्थापित करण्याची गरज अधोरेखित केली, असे मोदी म्हणाले.

वायुहल्ल्यानंतर जगातील अनेक नेत्यांशी चर्चा

इराणवर इस्त्रायलने केलेल्या मोठ्या वायुहल्ल्यानंतर, नेतान्याहू यांनी जगातील अनेक नेत्यांशी चर्चा सुरू केली आहे. जर्मन चान्सेलर ओलाफ स्कोल्झ, फ्रेंच अध्यक्ष इमॅन्युएल मॅक्रॉन यांच्याशी आधीच चर्चा केल्यानंतर, ते लवकरच अमेरिकेचे अध्यक्ष डोनाल्ड ट्रम्प, रशियाचे अध्यक्ष व्लादिमीर पुतिन आणि ब्रिटिश पंतप्रधान कीर स्टारमर यांच्याशी चर्चा करतील. भारताने दोन्ही देशांना तणाव वाढवणाऱ्या कृती टाळण्याचे आवाहन केले आहे.

नेतान्याहू काय म्हणाले?

इराणचा अणू आणि क्षेपणास्त्र कार्यक्रम इस्त्रायलसाठी धोकादायक असल्याचा नेतान्याहू यांनी आरोप केला आहे. आम्ही इराणच्या अण्वस्त्र केंद्रावर, प्रमुख अणुशास्त्रज्ञांवर आणि बॅलिस्टिक क्षेपणास्त्र कार्यक्रमावर हल्ला केला आहे, हा हल्ला इराणच्या नागरिकांविरुद्ध नाही हे स्पष्ट केले आहे.

इराण इस्त्रायलला जाऊ नका : रशियाचा इशारा

रशियाने आपल्या नागरिकांना इराण आणि इस्त्रायलला प्रवास करू नये असा इशारा दिला आहे. तसेच इस्त्रायलच्या वायुहल्ल्याचा तीव्र निषेध केला आहे. १३ जूनच्या रात्री इस्त्रायलने केलेली लष्करी कारवाई ही संयुक्त राष्ट्रांच्या सनदेचे आणि आंतरराष्ट्रीय कायद्याचे उल्लंघन आहे, असे रशियाच्या परराष्ट्र मंत्रालयाने म्हटले आहे.