30 जणांचा मृत्यू, हमासच्या एका कृतीमुळे युद्धविराम मोडला, नेतन्याहूंनी दिले गाझावर Powerful Strike चे आदेश!

Israel Hamas Ceasefire ended : इस्रायली पंतप्रधान नेतन्याहूंनी गाझावर हल्ल्याचे आदेश दिले आहेत. त्यांनी हमासवर युद्धविराम उल्लंघनाचा आरोप लावला आहे, ज्यात सैनिकांवर गोळीबार आणि ओलिसांच्या सुटकेत दिरंगाईचा समावेश आहे. 

Israel Hamas Ceasefire ended : इस्रायलचे पंतप्रधान बेंजामिन नेतन्याहू यांनी हमासवर युद्धविराम उल्लंघनाचा आरोप करत मंगळवारी गाझा पट्टीवर तात्काळ शक्तिशाली हल्ले करण्याचे आदेश दिले. त्यानंतर इस्रायली लष्कराने केलेल्या हल्ल्यात सुमारे ३० जणांचा मृत्यू झाला आहे. इस्रायलने म्हटले होते की, हमासने दक्षिण गाझामध्ये त्यांच्या सैनिकांवर गोळीबार केला. या तणावानंतर नेतन्याहू यांनी हे आदेश दिले आहेत. याशिवाय, नेतन्याहूंनी हमासवर ओलिसांच्या सुटकेत दिरंगाई केल्याचा आरोपही केला आहे.

हमासवर इस्रायल का संतापला?

इस्रायलने म्हटले आहे की, हमासने उघडपणे युद्धविरामाच्या अटींचे उल्लंघन केले आहे. त्यामुळे त्यांना प्रत्युत्तर देणे योग्य आहे. नेतन्याहूंच्या या पावलामुळे अमेरिकेचे अध्यक्ष डोनाल्ड ट्रम्प यांच्या उपस्थितीत झालेला इजिप्त शांतता करारही धोक्यात आला आहे. इस्रायलने स्पष्ट केले आहे की, हमासने ज्या प्रकारे ओलिसांचे मृतदेह परत केले आहेत, ते स्पष्टपणे शांतता करार तोडण्यासारखे आहे.

..तर हमासने इस्रायलसोबत विश्वासघात केला का?

सोमवार, २७ ऑक्टोबर रोजी हमासने २८ ओलिसांपैकी १६ वा मृतदेह सोपवला होता, जो १० ऑक्टोबर रोजी लागू झालेल्या युद्धविराम करारानुसार परत करण्यास तो सहमत झाला होता. तथापि, फॉरेन्सिक तपासणीनंतर असे आढळून आले की, हे अवशेष त्याच ओलिसाचे होते, ज्याचा मृतदेह दोन वर्षांपूर्वी परत करण्यात आला होता. इस्रायली सरकारच्या प्रवक्त्या शोश बेड्रोसियन यांनी सांगितले की, हमासने ओफिर जारफातीच्या मृतदेहाच्या अवशेषांचा शोध घेण्याचे नाटक केले. इस्रायली ओलीस आणि बेपत्ता कुटुंब फोरमच्या निवेदनात जारफातीच्या कुटुंबाचा हवाला देत म्हटले आहे की, "आम्हाला ओफिरची कबर उघडून आमच्या मुलाला पुन्हा दफन करण्यास भाग पाडण्याची ही तिसरी वेळ आहे."

इस्रायल-हमासने एकमेकांवर केले आरोप

नेतन्याहूंनी हल्ल्याचे आदेश दिल्यानंतर काही मिनिटांतच हमासने जाहीर केले की, ते मंगळवारी संध्याकाळी नियोजित असलेल्या आणखी एका ओलिसाचा मृतदेह आता सोपवणार नाहीत. एजेदीन अल-कस्साम ब्रिगेडने एका निवेदनात म्हटले आहे की, "इस्रायलकडून सतत युद्धविराम मोडला जात आहे. इस्रायलकडून गाझामध्ये केल्या जाणाऱ्या हल्ल्यांमुळे मृतदेहांचा शोध, उत्खनन आणि ते ताब्यात घेण्यात अडचणी येत आहेत." हमासचे म्हणणे आहे की, गाझामध्ये इस्रायलने केलेल्या विध्वंसामुळे मृतदेह शोधणे खूप कठीण झाले आहे. तर, इस्रायलचे म्हणणे आहे की, हमास जाणूनबुजून मृतदेह परत करण्यास विलंब करत आहे.