इस्लामाबाद कोर्ट भीषण स्फोटाने हादरलं!, १२ ठार तर २० जखमी; वकिलांना लक्ष्य करणारा 'आत्मघाती हल्ला' नेमका कसा घडला?

Islamabad Court Complex Blast: इस्लामाबादमधील न्यायालय संकुलाजवळ झालेल्या एका भीषण स्फोटात किमान १२ लोकांचा मृत्यू झाला असून, मृतांमध्ये आणि जखमींमध्ये प्रामुख्याने वकिलांचा समावेश आहे.

इस्लामाबाद: इस्लामाबादमधील न्यायालय संकुलाजवळ झालेल्या एका भीषण स्फोटात किमान १२ लोकांचा मृत्यू झाला असून, २० हून अधिक जण जखमी झाले आहेत. पाकिस्तानी माध्यमांच्या वृत्तानुसार, मृतांमध्ये आणि जखमींमध्ये प्रामुख्याने वकिलांचा समावेश आहे.

स्फोटाची भीषणता

मंगळवारी दुपारी सुमारे १२.३० वाजता, म्हणजेच न्यायालयाच्या peak hours मध्ये, इस्लामाबाद जिल्हा न्यायालयाच्या प्रवेशद्वाराजवळ ही घटना घडली. सुरुवातीच्या तपासात, पार्किंगमधील एका वाहनात बसवलेल्या गॅस सिलेंडरमुळे स्फोट झाला असावा असा संशय व्यक्त करण्यात आला होता, मात्र पोलिसांनी आता याला आत्मघाती हल्ला मानले आहे. स्फोटाची तीव्रता इतकी मोठी होती की, तो तब्बल सहा किलोमीटर दूरपर्यंत ऐकू आला, ज्यामुळे कोर्टाच्या आवारात तात्काळ घबराट पसरली. या घटनेच्या व्हिडिओमध्ये जळलेल्या वाहनातून आगीच्या ज्वाला आणि धुराचे लोट हवेत उठताना दिसत होते. जवळची अनेक वाहने उद्ध्वस्त झाली. जखमींमध्ये कोर्टातील वकील आणि कर्मचाऱ्यांची संख्या अधिक आहे.

"मी माझी गाडी पार्क करून संकुलात प्रवेश करत असतानाच, गेटवर मोठा आवाज झाला... मी पाहिले की गेटवर दोन मृतदेह पडले होते आणि अनेक गाड्यांना आग लागली होती," असे वकील रुस्तम मलिक यांनी एएफपीला सांगितले.

दहशतवादी कारवायांची पार्श्वभूमी

हा स्फोट पाकिस्तानात थैमान घालणाऱ्या दहशतवादी कारवायांचा भाग आहे. या घटनेच्या काही तास आधीच, पाकिस्तानी सुरक्षा दलांनी दक्षिण वझिरीस्तानमधील कॅडेट कॉलेज वाना येथे तहरीक-ए-तालिबान पाकिस्तान (TTP) चा हल्ला यशस्वीरित्या उधळून लावला होता, ज्यात दोन टीटीपी दहशतवादी मारले गेले होते.

टीटीपी (पाकिस्तानी तालिबान) हा पाकिस्तानसाठी अनेक वर्षांपासून मोठा धोका बनला आहे आणि तालिबान काबूलमध्ये परतल्यापासून त्यांच्या कारवाया वाढल्या आहेत. टीटीपीच्या कारवायांमुळेच पाकिस्तान आणि अफगाणिस्तानमधील संबंध अधिक बिघडले आहेत. या घटनेच्या आदल्याच दिवशी, दिल्लीतील लाल किल्ल्याजवळ एका कारमध्ये स्फोट होऊन १० लोकांचा मृत्यू झाला होता, तसेच पाकिस्तान-आधारित जैश-ए-मोहम्मद आणि अन्सार गझवत-उल-हिंद यांचा समावेश असलेला एक दहशतवादी गट उघडकीस आला होता.