Netanyahu: इराणचा थेट पंतप्रधान कार्यालयावर बॅलेस्टिक मिसाइल हल्ला, नेतन्याहूंचं काय झालं? इराणचा मोठा दावा

इराणच्या IRGC ने एक मोठा दावा केलाय. त्यांनी इस्रायलचे पंतप्रधान नेतन्याहू यांच्या कार्यालयावर आणि हवाई दल प्रमुखांच्या ठिकाणावर 'सरप्राइज' मिसाइल हल्ला केल्याचं म्हटलं आहे.

इराणच्या इस्लामिक रिव्होल्युशनरी गार्ड कॉर्प्स (IRGC) ने सोमवारी एक खळबळजनक दावा केला. त्यांनी थेट इस्रायलचे पंतप्रधान बेंजामिन नेतन्याहू यांच्या कार्यालयावर आणि इस्रायली हवाई दलाच्या कमांडरच्या ठिकाणावर 'सरप्राइज' मिसाइल हल्ला केल्याचं म्हटलं आहे. इराण टाइम्सच्या वृत्तानुसार, या हल्ल्यानंतर नेतन्याहू यांचं काय झालं, हे 'अस्पष्ट' असल्याचा दावा IRGC ने केला आहे.

फर्स न्यूज एजन्सीने दिलेल्या वृत्तानुसार, गार्ड्सने एका निवेदनात म्हटलं आहे की, "झिओनिस्ट राजवटीच्या गुन्हेगार पंतप्रधानांचे कार्यालय आणि हवाई दल कमांडरचे मुख्यालय लक्ष्य करण्यात आले."

इराणच्या तस्निम न्यूज एजन्सीनुसार, IRGC ने 'ट्रू प्रॉमिस 4 ऑपरेशन'ची दहावी लाट सुरू केल्याची घोषणा केली. या कारवाईत तेल अवीवमधील एका सरकारी इमारतीवर आणि पूर्व अल-कुद्स (जेरुसलेम) मधील लक्ष्यांवर हल्ला केल्याचा दावा करण्यात आला आहे.

IRGC च्या जनसंपर्क विभागाने आपल्या नवव्या अधिकृत निवेदनात म्हटलं आहे की, या हल्ल्यात 'खैबर मिसाइल्स'चा वापर करण्यात आला.

या हल्ल्यामुळे इस्रायलच्या ताब्यात असलेल्या प्रदेशात 'मोठ्या आगीचे दरवाजे उघडले' आहेत, असंही विभागाने म्हटलं आहे. यासोबतच, IRGC ने तेथील नागरिकांना 'लष्करी तळ, सुरक्षा केंद्रं आणि सरकारी इमारतींजवळील भागांतून त्वरित बाहेर पडा,' असा इशाराही दिला आहे.

युद्ध अधिकच चिघळले

या घटनेमुळे इराण, इस्रायल आणि अमेरिका यांच्यातील युद्ध अधिकच चिघळलं आहे. इराण-समर्थित दहशतवादी संघटनाही यात सामील झाल्याने हल्ल्यांची व्याप्ती संपूर्ण मध्य पूर्वेत पसरली आहे.

इराणने इस्रायल आणि अनेक अरब देशांवर मिसाइल डागली, तर हिजबुल्लाहने लेबनॉनमधून इस्रायलवर रॉकेट आणि ड्रोनने हल्ला केला. याला प्रत्युत्तर म्हणून इस्रायलने बेरूतच्या दक्षिण उपनगरात आणि दक्षिण लेबनॉनमध्ये जोरदार हवाई हल्ले केले. लेबनीज अधिकाऱ्यांनी दिलेल्या माहितीनुसार, यात किमान ३१ जणांचा मृत्यू झाला आहे. इस्रायलने १ लाखांहून अधिक राखीव सैनिक तैनात केले असून, ही लढाई दीर्घकाळ चालेल, असा इशारा दिला आहे.

अमेरिका आणि इस्रायलने केलेल्या हल्ल्यात इराणचे सर्वोच्च नेते अयातुल्ला अली खामेनी यांचा मृत्यू झाल्यानंतर हा संघर्ष अधिकच वाढला. युद्ध सुरू झाल्यापासून आतापर्यंत १३१ शहरांमध्ये किमान ५५५ जणांचा मृत्यू झाल्याची माहिती इराणी रेड क्रेसेंटने दिली आहे.