इराणचा मोठा निर्णय, होर्मुझ सामुद्रधुनी सर्वांसाठी खुली, फक्त अमेरिका आणि इस्रायलवर बंदी

Iran Bans US and Israeli Ships from Strait of Hormuz After Attack : अमेरिकेच्या हल्ल्यानंतर इराणने एक मोठं पाऊल उचललं आहे. होर्मुझच्या सामुद्रधुनीतून अमेरिका आणि इस्रायल वगळता इतर सर्व देशांच्या जहाजांसाठी वाहतूक खुली ठेवण्यात आल्याचं इराणने जाहीर केलं आहे. 

Iran Bans US and Israeli Ships from Strait of Hormuz After Attack : पश्चिम आशियातील तणावाच्या पार्श्वभूमीवर इराणने एक महत्त्वाचा निर्णय घेतला आहे. होर्मुझच्या सामुद्रधुनीतून होणारी जहाजांची वाहतूक अमेरिका आणि इस्रायल वगळता इतर सर्व देशांसाठी खुली असल्याचं इराणने स्पष्ट केलं आहे. इराणचं प्रमुख तेल निर्यात केंद्र असलेल्या खार्ग बेटावर (Kharg Island) अमेरिकन सैन्याने जोरदार हल्ला केला होता. या हल्ल्यानंतर इराणचे परराष्ट्र मंत्री अब्बास अराघची (Abbas Araghchi) यांनी हे विधान केलं. सध्या आम्ही हा महत्त्वाचा सागरी मार्ग बंद केलेला नाही, असंही त्यांनी स्पष्ट केलं.

"होर्मुझची सामुद्रधुनी खरंतर सर्वांसाठी खुली आहे," असं अराघची यांनी 'एमएस नाऊ' (MS Now) चॅनलला दिलेल्या मुलाखतीत सांगितलं. ते पुढे म्हणाले, "पण जे शत्रू देश आमच्यावर हल्ला करत आहेत आणि त्यांचे जे मित्र आहेत, फक्त त्यांच्यासाठी या मार्गावर निर्बंध घालण्यात आले आहेत." अमेरिका आणि इस्रायलच्या मालकीची मालवाहू जहाजं आणि टँकर्सना या मार्गावरून जाण्याची परवानगी नसेल, असं त्यांनी स्पष्ट केलं. इतर देश मात्र सुरक्षितपणे हा मार्ग वापरू शकतात, असंही त्यांनी नमूद केलं.

खार्ग बेटावरील अमेरिकेच्या हल्ल्यामुळे या भागातील परिस्थिती आणखी चिघळली आहे. जगातील एकूण तेल पुरवठ्याचा मोठा हिस्सा होर्मुझच्या सामुद्रधुनीतून जातो. त्यामुळे इराणने घातलेल्या या आंशिक निर्बंधांचा परिणाम जागतिक तेल बाजारावर होण्याची दाट शक्यता आहे. आमची सुरक्षा आणि सार्वभौमत्वाला आव्हान देणाऱ्या देशांना लक्ष्य करण्यासाठीच हे पाऊल उचलल्याची भूमिका इराणने घेतली आहे.