Iran US Tension : इराणचा अमेरिकेला थेट इशारा, 'दिलेली वचनं मोडली', शांतता चर्चा धोक्यात!

Iran Accuses US of Breaking Promises Halting Peace Talks : अमेरिकेसोबत शांतता चर्चेच्या आधीच दिलेल्या १० पैकी महत्त्वाच्या अटी मोडल्या गेल्या आहेत, असं इराणच्या संसद अध्यक्षांनी म्हटलं आहे. 

Iran Accuses US of Breaking Promises Halting Peace Talks : अमेरिकेसोबत शांतता चर्चा सुरू होण्यापूर्वीच इराणने दिलेल्या दहा कलमी प्रस्तावातील अटी मोडल्या गेल्या आहेत, असा थेट आरोप इराणचे संसद अध्यक्ष मोहम्मद बाकर कलिबाफ यांनी केला आहे. त्यामुळे ठरलेली शस्त्रसंधी आणि पुढील बोलणी आता धोक्यात आली आहेत. दहा कलमी योजनेतील तीन महत्त्वाच्या अटी आधीच मोडल्या गेल्या असून, अशा परिस्थितीत चर्चेला पुढे जाण्यात काहीच अर्थ नाही, असं कलिबाफ यांनी स्पष्ट केलं आहे.

इराणची मुख्य तक्रार ही आहे की, पाकिस्तानचे पंतप्रधान शेहबाज शरीफ यांनी शस्त्रसंधी लेबनॉनपर्यंत वाढवण्याचं जे आश्वासन दिलं होतं, ते पाळलं गेलं नाही. याशिवाय, इराणच्या हवाई हद्दीत शत्रू देशाच्या ड्रोनने घुसखोरी केली आणि युरेनियम संवर्धनाच्या इराणच्या हक्कावरूनही वाद निर्माण झाला. या कारणांमुळे परिस्थिती आणखी बिघडली आहे. करारातील अटी मोडल्या गेल्याने द्विपक्षीय चर्चेला काही अर्थ उरलेला नाही, असं कलिबाफ यांनी सोशल मीडियावर लिहिलं आहे.

दुसरीकडे, इराणने युरेनियम संवर्धन पूर्णपणे थांबवावं, या भूमिकेवर व्हाईट हाऊस ठाम आहे. ही राष्ट्राध्यक्ष ट्रम्प यांची 'रेड लाईन' असून यात कोणतीही तडजोड केली जाणार नाही, असं अमेरिकेने स्पष्ट केलं आहे. त्यामुळे शांततेसाठी सुरू असलेले प्रयत्न थांबले आहेत. चर्चा सुरू होण्यापूर्वीच दोन्ही बाजूंनी आपली भूमिका कडक केल्याने मध्य पूर्वेतील तणाव पुन्हा एकदा वाढला आहे. येत्या काही दिवसांत पाकिस्तानच्या मध्यस्थीने होणारी चर्चा यामुळे संकटात सापडली आहे.