Singapore Slap Case : टॅक्सी ड्राव्हरला कानशिलात लगावणाऱ्या भारतीय महिलेला दोन आठवड्यांच्या तुरुंगवासाची शिक्षा, नक्की काय आहे प्रकरण?

सिंगापूरमध्ये भारतीय वंशाच्या महिलेला अटक आणि तुरुंगवास. SGD 24 (सिंगापूर डॉलर) च्या टॅक्सी भाड्यावरून तिने ७३ वर्षांच्या ड्रायव्हरला का मारलं? या वादामागचं नेमकं कारण काय आहे, जाणून घ्या.

टॅक्सी ड्रायव्हरसोबत वाद

सिंगापूर कोर्टाने ३६ वर्षीय भारतीय वंशाच्या शालिनी देवराजनला दोन आठवड्यांची जेल सुनावली आहे. तिने ७३ वर्षांच्या टॅक्सी ड्रायव्हरला कानाखाली मारून जखमी केल्याचा आरोप आहे. हा वाद टॅक्सीच्या भाड्यावरून सुरू झाला.

नक्की प्रकरण काय?

कोर्टात दिलेल्या माहितीनुसार, ही घटना ११ नोव्हेंबर २०२५ रोजी घडली. शालिनी देवराजनने एकटीने टॅक्सी बुक केली आणि ड्रायव्हरला यिशुन हाऊसिंग इस्टेटमधील तिच्या अपार्टमेंटमध्ये सोडायला सांगितलं. शालिनीने मद्यपान केल्याचं ड्रायव्हरच्या लक्षात आलं. अपार्टमेंटजवळ पोहोचल्यावर ड्रायव्हरने SGD 24 भाडं मागितलं. तेव्हा शालिनी म्हणाली की तिच्याकडे रोख रक्कम किंवा ऑनलाइन पेमेंटचा पर्याय नाही.

नक्की काय घडले?

यानंतर शालिनीने कोणालातरी फोन केला आणि पैसे आणण्यासाठी वरती फ्लॅटमध्ये जात असल्याचं सांगितलं. ड्रायव्हरने तिला तिचा फोन तिथेच ठेवून जाण्यास सांगितलं, पण शालिनीने नकार दिला. सायंकाळी साधारण ४.२० वाजता तिने ड्रायव्हरच्या डाव्या गालावर चापट मारली. यानंतर ड्रायव्हरला वेदना झाल्या आणि त्याला उपचारासाठी एका दिवसाची वैद्यकीय रजा घ्यावी लागली.

महिलेला अटक

टॅक्सीचं भाडं तर मिळालंच नाही, उलट पोलिसांनी शालिनीला त्याच दिवशी अटक केली. सरकारी वकिलांनी पीडित ड्रायव्हरच्या उपचारासाठी सुमारे SGD 172 नुकसान भरपाईची मागणी केली. शालिनीने दावा केला की तिच्याकडे पैसे नव्हते आणि तिच्या खिशात SGD 50 ची नोट होती हे तिला माहीत नव्हतं. कोर्टाने कायदेशीर प्रक्रिया पूर्ण करून देवराजनला दोन आठवड्यांच्या तुरुंगवासाची शिक्षा सुनावली.