American Morning Culture: संध्याकाळी ६ ला जेवण, रात्री ८ ला झोप! अमेरिकेच्या लाईफस्टाईलमध्ये दिसली भारतीय संस्कृती

अमेरिकेत राहणाऱ्या भारतीय वंशाच्या सारिका यादव यांनी तिथल्या लोकांच्या लवकर जेवण्याच्या आणि झोपण्याच्या सवयीबद्दल आश्चर्य व्यक्त केलंय. पण ही पाश्चात्य संस्कृती नसून आपलीच सनातन पद्धत असल्याचं नेटकऱ्यांनी म्हटलंय. आयुर्वेद आणि विज्ञानानुसारही ही सवय आरोग्यासाठी खूप फायदेशीर आहे.

भारतातून अनेक लोक परदेशात जातात. अमेरिकेतही अनेक भारतीय स्थायिक झालेत. तिथल्या लोकांचं आयुष्य कसं असतं, त्यांची लाईफस्टाईल कशी असते, हे जाणून घेण्याची अनेकांना उत्सुकता असते. याच विषयावर कंटेंट क्रिएटर सारिका यादव (Sarika Yadav) यांनी आपला एक अनुभव शेअर केलाय.

सारिका यादव या मूळच्या भारतीय आहेत. सध्या त्या अमेरिकेत राहतात. तिथल्या लोकांच्या जेवणाच्या आणि झोपण्याच्या वेळा बघून त्या चांगल्याच थक्क झाल्यात. त्यांनी सोशल मीडियावर आपला हा अनुभव सांगितलाय. मैत्रिणींसोबत बोलताना काय घडलं, हे सारिका यांनी या व्हिडीओत सांगितलंय. "आपण भारतीय लोक रात्री ९ ते १० च्या दरम्यान जेवतो आणि ११-१२ वाजता झोपतो," असं सारिका यांनी त्यांच्या मैत्रिणींना सांगितलं. हे ऐकून त्या मैत्रिणींना मोठा धक्का बसला. त्या आश्चर्याने सारिका यांच्याकडे बघतच राहिल्या. पण विषय इथेच संपला नाही. अमेरिकन लोक संध्याकाळी ६ ते ६:३० च्या दरम्यान रात्रीचं जेवण उरकतात आणि ७:३० ते ८:३० च्या दरम्यान झोपूनही जातात! त्यानंतर पहाटे ४ किंवा ४:३० वाजता उठून ते आपल्या दिवसाची सुरुवात करतात, असं सारिका यांनी सांगितलं.

नेटकरी काय म्हणाले?

अमेरिकेतली सकाळची संस्कृती (Morning Culture) खरंच खूप छान आहे. तिथे सकाळी ६-७ वाजताच जिम आणि दुकानं उघडतात. कामं लवकर संपत असल्यामुळे संध्याकाळी कुटुंब आणि मित्रांसोबत वेळ घालवायला त्यांना भरपूर वेळ मिळतो, असं सारिका यांनी सांगितलं. सारिका यांनी हा व्हिडीओ सोशल मीडियावर शेअर करताच नेटकऱ्यांनी त्यावर वेगवेगळ्या प्रतिक्रिया द्यायला सुरुवात केली. "ही पाश्चात्य संस्कृती नाही, तर ही अस्सल भारतीय सनातन पद्धत आहे," अशा कमेंट्स अनेकांनी केल्या आहेत.

आपल्या देशातल्या खेड्यापाड्यांमध्ये आजही सूर्य मावळताच जेवण करण्याची आणि पहाटे ब्राह्म मुहूर्तावर (४:३० वाजता) उठण्याची पद्धत आहे. पण आजकालचं शहरी जीवन, नाईट शिफ्ट आणि मोबाईलच्या अतिवापरामुळे आपण हे सगळं विसरून गेलोय. खेड्यांमध्ये मात्र ही संस्कृती आजही जिवंत आहे, असं नेटकऱ्यांनी म्हटलंय. तसं पाहायला गेलं तर अमेरिकेच्या या 'मॉर्निंग कल्चर'मध्ये भारताचीच सनातन पद्धत दडलेली दिसते. भारतीय खेड्यांमध्येही अशीच जीवनशैली पाहायला मिळते. हा भारतीय संस्कृतीचाच एक भाग आहे. 'सूर्योदयापूर्वी सर्वांनी उठावं', असं काहींनी लिहिलंय. शिवाय, ही पाश्चात्य संस्कृती नसून पूर्णपणे सनातन संस्कृती असल्याचंही त्यांनी ठामपणे सांगितलंय.

संध्याकाळी ७ च्या आत जेवण उरकणं आणि पहाटे लवकर उठणं, याचे अनेक फायदे आहेत. पचनक्रिया, मेटाबॉलिझम आणि शांत झोपेसाठी हे खूप चांगलं असतं, असं फक्त आयुर्वेदच नाही, तर आजचं वैद्यकीय विज्ञानही सांगतं.