इथिओपियातील ज्वालामुखीची राख आता चीनच्या दिशेने, भारताचे आकाश झाले स्वच्छ!

Ethiopia Volcano Eruption Ash : इथिओपियातील ज्वालामुखीच्या उद्रेकामुळे निर्माण झालेली राख आणि धूर भारतीय आकाशातून पूर्णपणे नाहीसे झाले आहेत, असे हवामान विभागाने म्हटले आहे. राख आणि काळ्या ढगांचे साम्राज्य आता चीनच्या दिशेने सरकले आहे. 

Ethiopia Volcano Eruption Ash : आकाशातील चिंतेचे ढग दूर झाले आहेत. इथिओपियातील ज्वालामुखीच्या उद्रेकामुळे निर्माण झालेली राख आणि धूर भारतीय आकाशातून पूर्णपणे नाहीसे झाले आहेत, असे हवामान विभागाने सांगितले. राख आणि काळ्या ढगांचे आवरण चीनच्या दिशेने सरकले आहे. यामुळे भारतातील विमानसेवांना मोठा दिलासा मिळणार आहे. दरम्यान, DGCA ने दिलेला दक्षतेचा इशारा कायम राहील. 

इथिओपियातील ज्वालामुखीच्या उद्रेकामुळे काळ्या ढगांचे आवरण भारतीय आकाशातही पसरले होते. मंगळवारी रात्री १०:३० च्या सुमारास राखेचे ढग दूर झाल्याची माहिती केंद्रीय हवामान विभागाने दिली. सोमवारी रात्री हे काळे ढग भारतात पोहोचले होते. या ढगांमुळे देशातील विमानसेवांवर मोठा परिणाम झाला होता. अनेक विमाने रद्द करण्यात आली होती आणि काही उशिराने धावत होती. चिंता करण्याचे कारण नाही आणि परिस्थितीवर बारकाईने लक्ष ठेवले जात आहे, असे हवाई वाहतूक मंत्रालयाने सांगितले. या राखेमुळे दिल्लीतील वायू प्रदूषणावर कोणताही परिणाम झाला नाही, असे हवामान विभागाने स्पष्ट केले आहे. प्रदूषण कालच्यापेक्षा वाढलेले नाही, असेही सांगण्यात आले.

१२००० वर्षांपासून निष्क्रिय असलेला ज्वालामुखी फुटला

१२००० वर्षांपासून निष्क्रिय असलेला हेली गब्बी ज्वालामुखी फुटला आहे. हा भाग निर्मनुष्य असल्याने कोणतीही जीवितहानी झालेली नाही. तथापि, ज्वालामुखीची राख आणि धूर अनेक किलोमीटर उंचीवर आणि दूरवर पसरल्याने चिंता निर्माण झाली होती. याचा इथिओपियन हवाई हद्दीतून जाणाऱ्या विमानसेवांवर प्रतिकूल परिणाम झाला होता. ज्वालामुखीची राख आणि धूर विमानांमध्ये तांत्रिक बिघाड निर्माण करू शकतात. त्यामुळे विमान कंपन्यांना सतर्क राहण्याच्या सूचना देण्यात आल्या आहेत. नागरी विमान वाहतूक महासंचालनालयाने भारतातून उड्डाण करणाऱ्या विमानांसाठी यापूर्वीच एक परिपत्रक जारी केले होते. धोकादायक क्षेत्र टाळून प्रवास करावा, अशी सूचना त्यात होती.

 दिल्लीहून सुटणाऱ्या दोन आंतरराष्ट्रीय विमानसेवा गेल्या दिवशी रद्द करण्यात आल्या होत्या. दिल्लीहून ॲमस्टरडॅम आणि ॲमस्टरडॅमहून दिल्लीला जाणाऱ्या दोन विमानसेवा रद्द करण्यात आल्या होत्या. कोचीनहून दुबईला जाणारे इंडिगोचे विमान आणि जेद्दाला जाणारे आकासा एअरचे विमानही रद्द करण्यात आले होते. आता राख आणि धूर नाहीसे झाल्याने भारतातील विमानसेवा सामान्य स्थितीत परत येईल. इथिओपियाच्या उत्तरेकडील हेली गब्बी येथे रविवारी हा ज्वालामुखीचा उद्रेक झाला होता.