Volcano Eruption: ज्वालामुखीचा उद्रेक, आकाशात राखच राख; एमिरेट्सने दुबई-जकार्ता विमानसेवा केली रद्द

इंडोनेशियामध्ये ज्वालामुखीचा उद्रेक झाल्यामुळे एमिरेट्स एअरलाइनने दुबई-जकार्ता मार्गावरील काही विमानसेवा रद्द केल्या आहेत. जकार्ता विमानतळ तात्पुरतं बंद केल्यामुळे हा निर्णय घेण्यात आला. प्रवाशांनी विमानतळावर निघण्यापूर्वी आपल्या फ्लाइटचं स्टेटस तपासण्याचं आवाहन एअरलाइनने केलं आहे.

दुबई: इंडोनेशियात ज्वालामुखीचा मोठा उद्रेक झालाय. त्यामुळे आकाशात सगळीकडे धूर आणि राख पसरली आहे. याच कारणामुळे एमिरेट्स एअरलाइनने दुबई आणि जकार्ता दरम्यानची काही विमानसेवा रद्द केली आहे, तर काही फ्लाईट्स उशिराने धावत आहेत. जकार्तामधील सोएकर्नो-हत्ता आंतरराष्ट्रीय विमानतळ (Soekarno-Hatta International Airport) तात्पुरतं बंद ठेवण्यात आल्यामुळे हा निर्णय घेण्यात आला आहे.

एमिरेट्सच्या प्रवक्त्याने सांगितलं की, ५ आणि ६ सप्टेंबरच्या फ्लाईट्सवर याचा परिणाम झाला आहे. इंडोनेशियातील 'अनक क्राकातोआ' (Anak Krakatoa) ज्वालामुखीचा शनिवारी मोठा स्फोट झाला, ज्यामुळे सगळीकडे राख पसरली. यानंतर इंडोनेशियाने जकार्ता विमानतळासह देशातील एकूण सहा विमानतळांवरून होणारी वाहतूक तात्पुरती थांबवली आहे.

प्रवाशांसाठी सूचना

विमानतळावर जाण्यापूर्वी प्रवाशांनी आपल्या फ्लाईटचं सध्याचं स्टेटस नक्की तपासावं. एमिरेट्सच्या 'मॅनेज युवर बुकिंग' (Manage Your Booking) पोर्टलवर जाऊन आपला फोन नंबर आणि इतर संपर्क माहिती अपडेट करावी. ज्वालामुखीची राख विमानांच्या इंजिनसाठी खूप धोकादायक ठरू शकते आणि त्यामुळे समोरचं दिसणंही कमी होतं. म्हणूनच खबरदारी म्हणून विमानसेवा थांबवण्यात आली आहे. प्रवासी आणि कर्मचाऱ्यांची सुरक्षा आमच्यासाठी सर्वात महत्त्वाची आहे. या त्रासाबद्दल आम्ही दिलगीर आहोत, असं एमिरेट्सने स्पष्ट केलं आहे.