Scuba Diving: स्कूबा डायव्हिंगच्या नावाखाली तरुणीसोबत ट्रेनरनेच गैरवर्तन

Egypt Scuba Instructor Accused of Harassing Woman Underwater in Viral Video: इजिप्तमध्ये स्कूबा डायव्हिंग शिकायला गेलेल्या एका तरुणीसोबत ट्रेनरनेच गैरवर्तन केल्याची धक्कादायक घटना समोर आली आहे. पाण्याखाली डायव्हिंग करत असताना ट्रेनरने तिला चुकीच्या पद्धतीने स्पर्श केला. या तरुणीने हा व्हिडिओ शेअर करून आपल्यासोबत घडलेला प्रकार जगासमोर आणला आहे.

इजिप्त (९ मार्च): एकटीने प्रवास करणाऱ्या तरुणीसोबत स्कूबा डायव्हिंग करताना लैंगिक छळ झाल्याची एक धक्कादायक घटना समोर आली आहे. ही घटना इजिप्तमध्ये घडली असून, यामुळे मोठा संताप व्यक्त केला जात आहे. पाण्याखाली स्कूबा डायव्हिंग शिकवत असताना एका ट्रेनरने तरुणीसोबत गैरवर्तन केलं. त्याने तिला चुकीच्या पद्धतीने स्पर्श केला आणि मिठी मारण्याचाही प्रयत्न केला. या तरुणीने स्वतःच या घटनेचा व्हिडिओ शेअर करून आपल्यासोबत घडलेला धक्कादायक प्रकार जगासमोर आणला आहे.

रशा मेडियन नावाच्या या तरुणीने आपला भयानक अनुभव सांगितला आहे. रशाच्या म्हणण्यानुसार, ती 'ओपन वॉटर स्कूबा डायव्हिंग कोर्स' शिकत असताना ही घटना घडली. एकटीने डायव्हिंग शिकणाऱ्या रशाला टार्गेट करून ट्रेनरने पाण्याखाली तिच्या असहाय्यतेचा फायदा घेण्याचा प्रयत्न केला. ट्रेनिंगदरम्यान, इन्स्ट्रक्टरने तिला अशा प्रकारे स्पर्श केला, ज्याचा सुरक्षेशी किंवा शिकवण्याशी काहीही संबंध नव्हता. त्यामुळे आपल्याला खूप अवघडल्यासारखं झालं, असं रशाने म्हटलं आहे.

पाण्याखालीच ट्रेनरचा हात ढकलला

व्हायरल झालेल्या व्हिडिओमध्ये रशा पाण्याखाली इन्स्ट्रक्टरसोबत डायव्हिंगचा सराव करताना दिसत आहे. यावेळी, तिला मार्गदर्शन करण्याच्या बहाण्याने इन्स्ट्रक्टर तिच्या शरीराला अनेकदा स्पर्श करतो. रशाने आपल्या पोस्टमध्ये लिहिलं आहे की, इन्स्ट्रक्टरला थांबवण्यासाठी तिने त्याचा हात बाजूला ढकलला. व्हिडिओमध्ये हे स्पष्ट दिसतंय की, तिने त्याचा हात बाजूला सारला जेणेकरून तो पुन्हा स्पर्श करणार नाही.

पाण्याखाली अशा परिस्थितीत अधिकार वाटलेले असतात, असं रशा म्हणते. कारण डायव्हिंगचं पूर्ण नियंत्रण ट्रेनरच्या हातात असतं. त्यामुळे अस्वस्थ वाटत असलं तरी विद्यार्थी दबावाखाली येऊन गप्प बसतात. पण वैयक्तिक मर्यादा ओलांडणारं असं वर्तन कुणीही सहन करू नये, असं आवाहन तिने केलं आहे.

ट्रेनर सुरुवातीपासूनच संशयास्पद वागत होता

नंतर आणखी एक व्हिडिओ शेअर करत रशाने सांगितलं की, तो ट्रेनर सुरुवातीपासूनच संशयास्पदरीत्या वागत होता. एकटीने प्रवास करून स्कूबा डायव्हिंग शिकणाऱ्या महिलांनी डायव्हिंग स्कूल किंवा ट्रेनर निवडताना काळजी घ्यावी, असा सल्ला तिने दिला आहे. तिने आपल्या मेसेजमध्ये या घटनेला जबाबदार असलेल्या ट्रेनरचं नावही घेतलं आहे आणि त्याला कुणीही कामावर ठेवू नये, असंही म्हटलं आहे.