Mujtaba Khamenei: मुजतबा खामेनी इराणचे नवे सर्वोच्च नेते; निवडीनंतर बेपत्ता

Israel Iran War: अयातुल्ला अली खामेनेई यांच्या मृत्यूनंतर इराणने त्यांचा मुलगा मुजतबा खामेनेई यांना नवीन सुप्रीम लीडर म्हणून घोषित केलं आहे. पण, पदभार स्वीकारल्यापासून ते दिसलेले नाहीत आणि आता ते जखमी झाल्याच्या बातम्या येत आहेत. त्यामुळे त्यांच्या प्रकृतीबद्दल आणि इस्रायलच्या 'शोधून मारण्याच्या' धमकीमुळे गूढ आणखी वाढलं आहे.

Mujtaba Khamenei Latest News: सोमवारी तेहरानमध्ये सरकारी टीव्हीने मुजतबा खामेनेई यांना इराणचे नवे सुप्रीम लीडर म्हणून जाहीर केलं, पण या घोषणेनंतर मुजतबा कुठेच दिसलेले नाहीत. आता ते 'जखमी' असल्याची चर्चा सुरू झाली आहे. इराणच्या सरकारी टीव्हीने त्यांना 'जांबाज' (शूर) म्हटल्याने हा सस्पेन्स आणखी वाढला आहे. अर्थात, मुजतबा जखमी आहेत की बेपत्ता झाले आहेत, किंवा त्यांच्यावर हल्ला कुठे आणि कसा झाला, याबाबत अजून काहीही स्पष्ट झालेलं नाही.

इस्रायलने धमकी खरी ठरवली का?

अली खामेनेई यांच्या मृत्यूनंतर इस्रायल आणि अमेरिकेने स्पष्ट इशारा दिला होता की, त्यांच्या परवानगीशिवाय पुढचा नेता निवडला जाणार नाही. इस्रायलने तर उघडपणे म्हटलं होतं की, जो कोणी इराणचा पुढचा सुप्रीम लीडर बनेल, त्याला जगाच्या कोणत्याही कोपऱ्यात लपला तरी शोधून संपवलं जाईल. मुजतबा जखमी झाल्याच्या दाव्याला याच धमकीशी जोडून पाहिलं जात आहे.

चीनची साथ आणि जगाचा विरोध

इकडे, मिडल ईस्टमध्ये सुरू असलेल्या तणावाच्या पार्श्वभूमीवर चीन उघडपणे इराणच्या बाजूने उभा राहिला आहे. चीनने हा इराणचा अंतर्गत मामला असल्याचं सांगत बाहेरच्या देशांनी यात ढवळाढवळ करू नये, असं म्हटलं आहे. दुसरीकडे, न्यूयॉर्कमध्येही लोक रस्त्यावर उतरले आहेत आणि अमेरिका-इस्रायलचे हल्ले थांबवण्याची मागणी करत आहेत.

इराण युद्धात आतापर्यंत 1,200 हून अधिक मृत्यू

इराण या संघर्षाला 'रमजान युद्ध' म्हणत असला तरी, याची किंमत सामान्य लोकांना चुकवावी लागत आहे. 28 फेब्रुवारीपासून सुरू झालेल्या या युद्धाला आता 9 दिवस झाले आहेत. आतापर्यंत 1,255 लोकांचा मृत्यू झाला आहे. मीनाब शाळेवर झालेल्या हल्ल्यात 168 निष्पाप मुलांचा जीव गेला. याच हल्ल्यात डॉक्टर आणि नर्ससह 11 आरोग्य कर्मचाऱ्यांचाही मृत्यू झाला आहे. जवळपास 12,000 हून अधिक लोक हॉस्पिटलमध्ये दाखल आहेत आणि हजारो लोकांना आपली घरं सोडावी लागली आहेत.

मिडल ईस्ट वॉरचा परिणाम

या युद्धाचा परिणाम आता ग्लोबल सप्लाय चेनवरही दिसू लागला आहे. बहरीनची सरकारी तेल कंपनी 'बापको एनर्जीज'ने (Bapco Energies) आपल्या रिफायनरीवर इराणच्या ड्रोन हल्ल्यानंतर 'फोर्स मेज्योर' (Force Majeure) जाहीर केलं आहे. याचा सरळ अर्थ असा की, तेल पुरवठ्यात येणाऱ्या कोणत्याही अडथळ्यासाठी आता कंपनी जबाबदार राहणार नाही. यामुळे आंतरराष्ट्रीय बाजारात तेलाच्या किमती वाढण्याचा धोका निर्माण झाला आहे.