Ditwah चक्रीवादळाचा श्रीलंकेत कहर, 50 जणांचा मृत्यू तर 25 बेपत्ता, भारतातील दक्षिणेकडील राज्यांवरही होणार परिणाम!

Cyclone Ditwah Devastates Sri Lanka : चक्रीवादळामुळे श्रीलंकेत विक्रमी पावसाची नोंद झाली आहे. सर्व नद्यांच्या पाणी पातळीत वाढ झाली आहे. देशातील सरकारी कार्यालयांना आज सार्वजनिक सुट्टी जाहीर करण्यात आली आहे.

Cyclone Ditwah Devastates Sri Lanka : श्रीलंकेत 'डिटवा' चक्रीवादळाने मोठे नुकसान केले आहे. मृतांचा आकडा 50 पार गेला आहे. 25 जण बेपत्ता आहेत. चक्रीवादळामुळे श्रीलंकेत विक्रमी पावसाची नोंद झाली आहे. सर्व नद्यांच्या पाणी पातळीत वाढ झाली आहे. देशातील सरकारी कार्यालयांना आज सार्वजनिक सुट्टी जाहीर करण्यात आली आहे. आंतरराष्ट्रीय शाळा बंद ठेवण्याचे निर्देशही देण्यात आले आहेत. कोलंबोमध्ये विमान उतरू शकत नसल्यास ते तिरुअनंतपुरम किंवा कोचीकडे वळवण्यात येईल, असे सरकारने म्हटले आहे. राष्ट्रीय उद्याने बंद करण्यात आली असून अनेक रस्ते खराब झाले आहेत. आज सकाळी 6 वाजल्यापासून सर्व रेल्वे सेवा बंद ठेवण्यात आल्या आहेत.

किनारपट्टीवर हाय अलर्ट

'डिटवा' चक्रीवादळ तीव्र झाल्याने तामिळनाडू, आंध्र प्रदेश आणि पुद्दुचेरीच्या किनारपट्टीवर हाय अलर्ट जारी करण्यात आला आहे. तामिळनाडूमध्ये मुसळधार पावसाचा इशारा देण्यात आला आहे. 4 जिल्ह्यांमध्ये रेड अलर्ट आणि 6 जिल्ह्यांमध्ये ऑरेंज अलर्ट जाहीर करण्यात आला आहे. खबरदारीचा उपाय म्हणून चेन्नईतील जलाशयांमधून पाणी सोडण्यात आले आहे. रेड हिल्स, पूंडी आणि चेंबारामबक्कम जलाशयांमधून प्रति सेकंद 200 घनफूट पाणी सोडले जात आहे. मुख्यमंत्री एम. के. स्टॅलिन यांनी आपत्ती निवारण प्राधिकरणाच्या मुख्यालयात पोहोचून परिस्थितीचा आढावा घेतला.