जगभरात ख्रिसमसचा उत्साह, पंतप्रधान मोदीही ख्रिसमस मॉर्निंग सेवेस, पोप यांनी दिला गरिबांवर दया करण्याचा संदेश!

Christmas 2025 Celebrations Worldwide : व्हॅटिकनमधील सेंट पीटर बॅसिलिकामध्ये पोप लिओ XIV यांनी ख्रिस्तजन्माच्या विधी आणि मध्यरात्रीच्या मासचे नेतृत्व केले. पोप म्हणून निवड झाल्यानंतर लिओ XIV यांचा हा पहिलाच ख्रिसमस आहे.

Christmas 2025 Celebrations Worldwide : येशू ख्रिस्ताच्या जन्माच्या आठवणीत जगभरातील ख्रिस्ती बांधवांनी ख्रिसमस साजरा केला. व्हॅटिकनमधील सेंट पीटर बॅसिलिकामध्ये पोप लिओ XIV यांनी ख्रिस्तजन्माच्या विधी आणि मध्यरात्रीच्या मासचे नेतृत्व केले. पोप म्हणून निवड झाल्यानंतर लिओ XIV यांचा हा पहिलाच ख्रिसमस आहे. या कार्यक्रमात २०० हून अधिक सदस्यांचा गायकवृंद सहभागी झाला होता. दरम्यान, पंतप्रधान नरेंद्र मोदी यांनी दिल्लीतील ख्रिसमस मॉर्निंग सेवेस हजेरी लावली. याचा व्हिडिओ एएनआयने प्रसिद्ध केला आहे.

बाळ येशूच्या जन्माच्या घोषणेने कार्यक्रमाला सुरुवात झाली. त्यानंतर, पोप यांनी वेदीसमोरील बायबल स्टँडवर रेशमात गुंडाळलेली बाळ येशूची मूर्ती उघडली. पोप यांनी लोकांना अपरिचित आणि गरिबांवर दया दाखवण्याचे आवाहन केले. 'गरजूंना दुर्लक्षित करणे म्हणजे देवाला दुर्लक्षित करण्यासारखे आहे,' असे पोप यांनी ख्रिसमसच्या सकाळच्या प्रार्थनेत सांगितले. सुमारे सहा हजार लोकांनी बॅसिलिकामधील या कार्यक्रमाला हजेरी लावली. 

येशूचे जन्मस्थान असलेल्या बेथलहेममध्ये दोन वर्षांनंतर ख्रिसमस साजरा करण्यात आला. गाझामधील युद्धामुळे पॅलेस्टाईनमधील ख्रिस्ती बांधवांनी ख्रिसमस साजरा केला नव्हता. नेटिव्हिटी चर्चमधील मध्यरात्रीच्या मासमध्ये शेकडो भाविक सहभागी झाले होते.

आखाती देशांतील चर्चमध्येही ख्रिस्तजन्माचा उत्सव

आखाती देशांतील चर्चमध्येही ख्रिस्तजन्माचा उत्सव साजरा करण्यात आला. दुबई, अबू धाबी आणि शारजाह येथील चर्चमध्ये संध्याकाळची प्रार्थना, ज्योतीची सेवा आणि पवित्र मासमध्ये भाविक सहभागी झाले. रियाधमधील भारतीय दूतावासातही मोठा उत्सव साजरा झाला. दुबईतील ऊद मेहता येथील सेंट थॉमस ऑर्थोडॉक्स कॅथेड्रलमध्ये ख्रिसमसच्या विधींचे मुख्य नेतृत्व थुंबामोन बिशप डॉ. अब्राहम मार सेराफिम मेट्रोपॉलिटन यांनी केले.