कर्करोगग्रस्त तरुणाची फसवणूक?

चीनमध्ये एका कर्करोगग्रस्त तरुणाने उपचारासाठी ऑनलाइन मदत मागितली आणि मिळालेल्या पैशातून फ्लॅट खरेदी केल्याने वाद निर्माण झाला आहे. त्याने आपली संपत्ती लपवून लोकांकडून सुमारे ८२ लाख रुपये जमा केले होते.

चीनमध्ये एका कर्करोगग्रस्त तरुणाने आपली संपत्ती लपवून उपचारासाठी आर्थिक मदत मागितली आणि त्या पैशातून स्वतःसाठी फ्लॅट खरेदी केल्याने वाद निर्माण झाला आहे. त्याला उपचारासाठी सुमारे ८२ लाख रुपये मिळाले होते. २९ वर्षीय तरुणाने ९,००,००० युआन (१२५,००० अमेरिकी डॉलर) ऑनलाइन पद्धतीने जमा करण्याचा प्रयत्न केला होता. 

त्याच्या पोस्ट व्हायरल झाल्यानंतर अनेक लोकांनी त्याला मदत केली आणि काही दिवसांतच त्याला ७,००,००० युआन (९७,००० अमेरिकी डॉलर) म्हणजेच ८२ लाख भारतीय रुपये मिळाले. मात्र, दरम्यान, त्याने आपल्या नवीन फ्लॅटचा फोटो सोशल मीडियावर शेअर केल्याने लोकांना संशय आला. त्यानंतर झालेल्या चौकशीत त्याने उपचारासाठी जमा केलेल्या पैशातून फ्लॅट खरेदी केल्याचे उघड झाले. 

मध्य चीनमधील हुबेई प्रांतातील यिचांग येथील लानने हे फसवणूक केली. १४ ऑक्टोबर रोजी त्याने एका लोकप्रिय क्राउडफंडिंग प्लॅटफॉर्मवर आपल्याला हॉजकिन लिंफोमा हा दुर्मिळ कर्करोग झाल्याचे सांगून निधी संकलनाची मोहीम सुरू केली. 

२०२० मध्ये शांघायच्या उत्तरेकडील जिआंग्सू प्रांतातील नानजिंग विद्यापीठातून पदवी घेतल्यानंतर दक्षिण चीनमधील ग्वांगझू येथील एका प्रमुख इंटरनेट कंपनीत काम करत असल्याचे त्याने निधी संकलनाच्या व्हिडिओमध्ये सांगितले. 

डॉक्टरांच्या प्रमाणपत्रांसह त्याने स्वतःला कर्करोग झाल्याचे व्हिडिओमध्ये दाखवले होते. वडिलांच्या आजारपणामुळे आणि मृत्यूमुळे त्याच्या कुटुंबाची आर्थिक परिस्थिती खूपच खराब असल्याचे आणि मोठ्या कर्जबाजारीपणात असतानाच त्याला हा आजार झाल्याचे त्याने सांगितले. 

काही दिवसांतच क्राउडफंडिंग मोहिमेतून त्याला ७,००,००० युआनपेक्षा जास्त रक्कम मिळाली. ६ नोव्हेंबर रोजी, एका ग्रुप चॅटमध्ये त्याने आपल्या नवीन फ्लॅटचे फोटो शेअर केल्याने त्याच्या आर्थिक व्यवहारांबाबत लोकांना संशय आला.

"हे माझे नवीन घर आहे, एकूण किंमत ७३८,००० युआन" असे लिहून त्याने सोशल मीडियावर पोस्ट शेअर केली, ज्यामुळे आता टीका होत आहे.

फसवणूक उघड झाल्यानंतर लोकांनी केलेल्या चौकशीत त्याच्या कुटुंबाकडे एक दशलक्ष युआन (१४०,००० अमेरिकी डॉलर) किमतीचे दोन निवासी फ्लॅटसह अनेक मालमत्ता असल्याचे आढळून आले. त्यांच्याकडे ३.८ दशलक्ष युआन किमतीची व्यावसायिक मालमत्ता होती, ज्यातून त्यांना १४५,००० युआन भाडे मिळत होते. याशिवाय त्यांना भाड्यातूनही मोठी रक्कम मिळत होती.

फसवणूक उघड झाल्यानंतर क्राउडफंडिंग प्लॅटफॉर्मने त्याचा निधी मागणीचा व्हिडिओ काढून टाकला. खाजगी मालमत्ता खरेदी करण्यासाठी उपचार निधी वापरल्याचा आरोप फेटाळत, लानने नंतर दावा केला की त्याने देणगीतील २००,००० युआन एका निश्चित मुदतीच्या बचत खात्यात जमा केले होते.

(प्रतिनिधिक छायाचित्र)