China Viral News: मृत समजून शवपेटीत ठेवलं, अचानक आतून आवाज आला; २ दिवसांनी खरंच मृत्यू

उत्तर चीनमध्ये एक धक्कादायक घटना घडली आहे. मृत समजून एका वृद्ध महिलेला रेफ्रिजरेटेड शवपेटीत ठेवण्यात आलं होतं. पण अचानक ती जिवंत झाली. दुर्दैवाने, दोन दिवसांनंतर तिचा खरोखरच मृत्यू झाला. या घटनेने सगळेच हादरले आहेत.

उत्तर चीनमध्ये एक अत्यंत धक्कादायक घटना समोर आली आहे. मृत समजून एका वृद्ध महिलेला रेफ्रिजरेटेड शवपेटीत (refrigerated coffin) ठेवण्यात आलं होतं. पण अचानक तिच्या शरीरात हालचाल दिसली. दुर्दैवाने, दोन दिवसांनंतर तिचा खरोखरच मृत्यू झाला. या घटनेने नातेवाईक आणि सोशल मीडिया युजर्स चांगलेच हादरले आहेत. चिनी मीडिया रिपोर्ट्सनुसार, ही महिला ७० वर्षांची होती आणि हेबेई (Hebei) प्रांतात राहायची. ती गेल्या अनेक दशकांपासून 'सेरेब्रल थ्रोम्बोसिस' (cerebral thrombosis) या आजाराने त्रस्त होती आणि कॅन्सरशीही झुंज देत होती.

डॉक्टरांनी तिचा कॅन्सर आता बरा होऊ शकत नाही असं सांगितल्यावर, शेवटच्या दिवसांत तिची काळजी घेण्यासाठी कुटुंबीयांनी तिला घरी आणलं होतं.

८ सप्टेंबर रोजी, या महिलेच्या शरीरात कोणतीही हालचाल जाणवली नाही. ती मरण पावली आहे असं समजून, बाहेरगावी राहणाऱ्या नातेवाईकांची वाट पाहण्यासाठी कुटुंबीयांनी तिचा मृतदेह एका रेफ्रिजरेटेड शवपेटीत ठेवला. जेणेकरून मृतदेह खराब होऊ नये.

पण काही वेळाने, महिलेच्या सुनेला शवपेटीच्या आतून काहीतरी गुणगुणल्याचा (humming) अस्पष्ट आवाज आला. हा आवाज ऐकून कुटुंबीय घाबरले. त्यांनी लगेच शवपेटी उघडली आणि त्या वृद्ध महिलेला बाहेर काढलं.

११ सप्टेंबर रोजी जेव्हा इतर नातेवाईक घरी पोहोचले, तेव्हा ती महिला शुद्धीवर आली होती आणि तिने डोळेही उघडले होते. पण तिची प्रकृती अत्यंत चिंताजनक होती. तिला काहीही खाता-पिता येत नव्हतं.

त्याच दिवशी रात्री या महिलेने अखेरचा श्वास घेतला. त्यानंतर १३ सप्टेंबर रोजी नातेवाईकांच्या उपस्थितीत तिच्यावर अंत्यसंस्कार करण्यात आले.

या महिलेच्या एका नातेवाईकाने ही विचित्र घटना सोशल मीडियावर शेअर केली. त्यानंतर अनेकांनी ही घटना खरी आहे की खोटी, यावर प्रश्न उपस्थित केले.

यावर पोस्ट करणाऱ्या व्यक्तीने स्पष्ट केलं की, "कोणताही माणूस आपल्याच कुटुंबातील सदस्याच्या जीवनाविषयी आणि मृत्यूविषयी अशी खोटी गोष्ट रचणार नाही."

परिसरातील काही गावकऱ्यांनीही या घटनेबद्दल ऐकल्याचं सांगितलं. गावात या प्रकरणाची जोरदार चर्चा सुरू होती.

एका गाव अधिकाऱ्याने दिलेल्या माहितीनुसार, कुटुंबाने शवपेटी 'डीप-फ्रीझिंग' मोडवर न ठेवता फक्त 'रेफ्रिजरेशन' मोडवर ठेवली होती. नातेवाईक येईपर्यंत मृतदेह सुरक्षित राहावा, हाच त्यामागचा उद्देश होता.

डॉक्टरांच्या मते, हा प्रकार 'अॅपरेंट डेथ' (apparent death) म्हणजेच 'वरवरचा मृत्यू' असू शकतो. या अवस्थेत माणसाची लक्षणं इतकी क्षीण होतात की ती ओळखणं खूप कठीण जातं.

'हेल्थ टाइम्स'ने (Health Times) दिलेल्या माहितीनुसार, अशा स्थितीत रुग्णाचा श्वास आणि हृदयाचे ठोके अत्यंत कमकुवत होतात. शरीराची चयापचय क्रिया (metabolism) लक्षणीयरीत्या मंदावते आणि रुग्ण खोल कोमात जातो. त्यामुळे तो मृत असल्यासारखा वाटतो.

एखादी व्यक्ती खरोखर मरण पावली आहे की नाही, हे ठरवण्यासाठी वैद्यकीय तज्ज्ञ अत्यंत कठोर निकष वापरतात. जोपर्यंत जीवंत असण्याची थोडी जरी शक्यता असते, तोपर्यंत रुग्णाला वाचवण्याचे प्रयत्न सुरूच ठेवले जातात.