Career Change : दीड कोटींची नोकरी सोडून झाली कंटेंट क्रिएटर, आता महिन्याची कमाई फक्त 500 रुपये

आजकाल कंटेंट क्रिएशनचा मोठा ट्रेंड आहे. कॅनडामधील एका महिलेने तर चक्क दीड कोटी रुपयांची नोकरी सोडून हा मार्ग निवडला, पण तिची पहिली कमाई ऐकून तुम्ही थक्क व्हाल.

कॅनडा : कंटेंट क्रिएटर बनलं की महिन्याला लाखो रुपये मिळतात, असं अनेकांना वाटतं. पण खरं तर तसं नाहीये. सुरुवातीला काहींना यातून शंभर-हजार रुपयेच मिळतात. तरीही, एकाच प्रकारच्या कामाला कंटाळलेले काहीजण चांगल्या पगाराची नोकरी सोडून स्वतःचा मार्ग निवडत आहेत. याचंच एक उत्तम उदाहरण म्हणजे कॅनडात राहणारी प्रोडक्ट डिझायनर हेगी जियांग हिची गोष्ट.

दीड कोटींचा पगार सोडला

जियांग वर्षाला जवळपास १.५ कोटी रुपये पगार घेत होती. तिची नोकरी सकाळी ९ ते संध्याकाळी ५ अशी होती. आठवड्यातून सुमारे ४० तास काम करूनही तिला वर्क-लाइफ बॅलन्स साधणं कठीण नव्हतं. तरीही तिने आपल्या टेक जॉबचा राजीनामा दिला.

याचं कारण कामाचा कंटाळा किंवा बर्नआउट नव्हतं. नोकरीसोबतच तिने कंटेंट क्रिएशन सुरू केलं होतं आणि तिला पुस्तक लिहिण्याची संधीही मिळाली. नोकरी, पुस्तक लिहिणं आणि कंटेंट तयार करणं... या सगळ्या गोष्टी एकत्र सांभाळणं तिला कठीण जात होतं. त्यामुळे तिने पूर्णपणे स्वतःच्या कामावर लक्ष केंद्रित करण्याचा निर्णय घेतला. तिने जूनमध्ये नोकरी सोडली आणि स्वतःच्या निर्णयाची चाचणी घेण्यासाठी तिने स्वतःला एक वर्षाचा वेळ दिला आहे. एका वर्षानंतर पुन्हा कॉर्पोरेट नोकरीत परतायचं की याच मार्गावर पुढे जायचं, हे ती ठरवणार आहे.

नोकरी सोडल्यानंतर तिच्या कमाईत मात्र मोठा बदल झाला. जुलै महिन्यात कंटेंट क्रिएशनमधून तिला फक्त ६ डॉलर, म्हणजे जवळपास ५०० रुपये मिळाले. पण हे तिचं एकूण उत्पन्न नाही. पुस्तकासाठी मिळालेली ॲडव्हान्स रक्कम आणि इतर मार्गांनी तिला पैसे मिळत आहेत. पुढच्या काही महिन्यांत तिची कमाई वाढेल, असा तिला विश्वास आहे.

सोशल मीडियातून महिन्याला फक्त ५०० रुपये मिळूनही जियांगला तिच्या निर्णयाचा कोणताही पश्चात्ताप नाही. उलट, तिला आता वेळेचं आणि कामाचं जास्त स्वातंत्र्य मिळालं आहे, असं ती म्हणते. कंटेंट क्रिएटर होताच महिन्याला लाखो रुपये मिळतीलच असं नाही. यासाठी सातत्य आणि मेहनत गरजेची आहे.