Boba Tea : बाप्पाला मोदक नाही, चक्क बबल टी? थायलंडमधील गणपतीचा नैवेद्य पाहून व्हाल थक्क

बँकॉकमध्ये (थायलंड) बाप्पाला चक्क बबल टीचा नैवेद्य दाखवला जात आहे. याचा एक व्हिडिओ सध्या व्हायरल झालाय. भारतात जसे आपण मोदक-लाडू अर्पण करतो, तसंच थायलंडमध्ये तिथलं प्रसिद्ध पेय देवाला वाहिलं जातं. थायलंडमध्ये गणपतीला 'फ्रा फिकानेत' नावाने ओळखलं जातं आणि तो समृद्धीची देवता मानला जातो.

बँकॉक : गणेश चतुर्थी म्हटलं की बाप्पासाठी मोदक, लाडू, फळं आणि मिठाईचा नैवेद्य आलाच. पण सध्या थायलंडमधला एक व्हिडिओ सोशल मीडियावर धुमाकूळ घालतोय. यात भक्तगण बाप्पाला एक वेगळाच नैवेद्य दाखवताना दिसत आहेत, जो पाहून तुम्हीही आश्चर्यचकित व्हाल.

बँकॉकची कंटेंट क्रिएटर पिया पिंगने हा व्हिडिओ शेअर केला आहे. यामध्ये भक्तगण गणपतीच्या मूर्तीला 'बबल टी' किंवा 'बोबा टी' अर्पण करत आहेत. हा अनोखा नैवेद्य पाहून भारतीय नेटकऱ्यांना विशेषतः आश्चर्य वाटलं, कारण आपल्याकडे गणेशोत्सवात पारंपरिक नैवेद्य दाखवण्याची पद्धत आहे.

पिया तिच्या इन्स्टाग्राम व्हिडिओमध्ये या प्रथेबद्दल सांगते, “मला माहित आहे की आपण गणेशाला त्याचा आवडता पदार्थ लाडू अर्पण करतो, पण इथे बँकॉक, थायलंडमध्ये आम्ही हे, बबल टी अर्पण करतो.”

हा व्हायरल व्हिडिओ येथे पहा: 

हा व्हिडिओ थायलंडमध्ये गणेशाला असलेल्या महत्त्वाचं स्थान दाखवतो. तिथे गणपतीला 'फ्रा फिकानेत' (Phra Phikanet) आणि 'फ्रा फिकानेसुअन' (Phra Phikanesuan) अशा नावांनी ओळखलं जातं. गणपतीला तिथे भाग्य, यश आणि अडथळे दूर करणारी देवता मानलं जातं. या पूजेतून त्या प्रदेशातील हिंदू आणि बौद्ध परंपरांचा मिलाफही दिसून येतो.

थायलंडमध्ये गणेशाची उपस्थिती हा एका मोठ्या इतिहासाचा भाग आहे. अनेक शतकांपूर्वी व्यापार आणि सांस्कृतिक देवाणघेवाणीतून हिंदू श्रद्धा आणि भारतीय संस्कृती दक्षिण, पूर्व आणि आग्नेय आशियाच्या अनेक भागांमध्ये पोहोचली. जसजशी ही परंपरा वेगवेगळ्या प्रदेशांमध्ये विकसित झाली, तसतशा स्थानिक प्रथा आणि भक्तीचे प्रकारही उदयास आले.

थायलंडमध्ये, भक्त समृद्धी आणि यशासाठी प्रार्थना करताना गणपतीला मिठाई, फळे आणि इतर वस्तू अर्पण करतात. पियाच्या व्हिडिओमध्ये दिसणारी बबल-टीची प्रथा या परंपरेला एक आधुनिक आणि खास थाई टच देते.

हा क्षण आपल्याला हेही दाखवून देतो की धार्मिक उत्सव वेगवेगळ्या संस्कृतींमध्ये वेगवेगळी रूपं घेऊ शकतात. भारतात भक्तगण गणपती उत्सव मोदक आणि लाडूंशी जोडतात, तर बँकॉकचा हा व्हिडिओ दाखवतो की पूजेमध्ये स्थानिक समाजाला परिचित असलेल्या गोष्टींचा समावेश कसा होऊ शकतो.

सध्या गणेश चतुर्थीचा उत्साह सुरू असताना, 'बाप्पासाठी बोबा टी'च्या या अनोख्या क्षणाने सोशल मीडिया युजर्सना भारताबाहेर गणेशाची पूजा किती विविध प्रकारे केली जाते, याची एक नवी झलक दिली आहे.