कॅनडाचा भारतावर सायबर हल्ल्याचा आरोप; आक्रमक देशांच्या यादीत भारताचा समावेश
खलिस्तान दहशतवादी हरदीप सिंग निज्जरच्या हत्येप्रकरणी केंद्रीय गृहमंत्री अमित शहा यांचा सहभाग असल्याचा कॅनडाचा आरोप. भारताने या आरोपांवर तीव्र निषेध नोंदवला आहे.
दिल्ली: कॅनडाने भारताविरुद्ध प्रतिशोधात्मक कारवाई केली आहे. सायबर हल्लेखोर देशांच्या यादीत भारताचा समावेश करण्यात आला आहे. या यादीत भारताचा पाचवा क्रमांक आहे. सायबर सुरक्षेच्या वार्षिक अहवालात हा उल्लेख आहे. भारताविरुद्ध हेरगिरीचे नेतृत्व प्रशासनातील वरिष्ठ अधिकारी करत असल्याचा गंभीर आरोपही या अहवालात आहे.
खलिस्तान दहशतवादी हरदीप सिंग निज्जरच्या हत्येप्रकरणी केंद्रीय गृहमंत्री अमित शहा यांचा सहभाग असल्याचा कॅनडाचा आरोप आहे. यावर भारताने तीव्र निषेध नोंदवला आहे. निज्जर हत्याकांड आणि कॅनडाचे निरीक्षण या दोन्ही प्रकरणांमध्ये अमित शहा यांचा सहभाग असल्याचे कॅनडाचे परराष्ट्र उपमंत्री आणि सुरक्षा सल्लागार यांनी सुरक्षा स्थायी समितीसमोर सांगितल्याने भारताचा संताप झाला होता.
हे आरोप निराधार आणि असत्य असल्याचे म्हणत भारताने कॅनडाच्या उच्चायुक्तालयाच्या प्रतिनिधीला बोलावून निषेधाची नोंद केली. भारताची बदनामी करण्याचा हा जाणीवपूर्वक प्रयत्न असून याचे द्विपक्षीय संबंधांवर गंभीर परिणाम होतील, असे परराष्ट्र मंत्रालयाने म्हटले आहे.
कॅनडामधील भारतीय वाणिज्य दूतावास अधिकाऱ्यांवर सतत लक्ष ठेवले जात आहे. राजनैतिक संबंधांच्या विरोधात ही कृती असल्याची सूचना कॅनडाकडून सतत दुर्लक्षित केली जात आहे. तेथील भारतीय आणि विद्यार्थ्यांच्या सुरक्षेबाबत चिंता व्यक्त करण्यात आली आहे, असे परराष्ट्र मंत्रालयाच्या प्रवक्त्याने म्हटले आहे. निज्जर हत्याकांडानंतर भारताचे कॅनडाशी असलेले राजनैतिक संबंध बिघडले होते. अमित शहा यांच्यावर आरोप झाल्यानंतर ते आणखीच बिघडले. राजनैतिक अधिकाऱ्यांना हद्दपार करण्यापासून सुरू झालेला हा संघर्ष कठोर निर्बंधांपर्यंत जाऊ शकतो, असे संकेत मिळत आहेत.
भारताने दहशतवादी म्हणून घोषित केलेला हरदीप सिंग निज्जर गेल्या वर्षी १८ जून रोजी गोळ्या घालून ठार मारण्यात आला होता. या हत्येत भारताचा हात असल्याचा आरोप कॅनडाचे पंतप्रधान जस्टिन ट्रूडो यांनी केला होता. ट्रूडो यांचे आरोप निराधार असल्याचे भारताने म्हटले आहे. मात्र ट्रूडो यांच्या या आरोपांमुळे भारत-कॅनडा संबंध बिघडले आहेत. करण ब्रार, कमलप्रीत सिंग, करणप्रीत सिंग यांना हरदीप सिंग निज्जर हत्या प्रकरणी कॅनडा पोलिसांनी अटक केली आहे. एडमंटन येथून त्यांना अटक करण्यात आली. अटक करण्यात आलेले तिघेही भारतीय नागरिक आहेत.
)
)
)
)