बांग्लादेश कोर्टाने हिंदू साधू चिन्मय कृष्ण दास यांचा जामीन फेटाळला

देशद्रोहाच्या आरोपावरून अटक करण्यात आलेले हिंदू आध्यात्मिक नेते चिन्मय कृष्ण दास यांचा जामीन अर्ज बांगलादेशच्या न्यायालयाने फेटाळला आहे. चितगाव न्यायालयात झालेल्या सुनावणीनंतर जामीन अर्ज फेटाळण्यात आला आहे.

देशद्रोहाच्या प्रकरणात अटक करण्यात आलेले हिंदू आध्यात्मिक नेते चिन्मय कृष्ण दास यांना बांगलादेशच्या न्यायालयाने धक्का दिला आहे. देशद्रोहाच्या आरोप प्रकरणात अटक करण्यात आलेले चिन्मय कृष्ण दास यांनी जामीनासाठी उच्च न्यायालयात अर्ज दाखल केला होता. त्यानुसार आज त्यांना कडक सुरक्षेमध्ये न्यायालयात हजर करण्यात आले. चितगाव कोर्टात सुमारे ३० मिनिटे दोन्ही बाजूंचे युक्तिवाद ऐकल्यानंतर न्यायाधीशांनी चिन्मय कृष्ण दास यांचा जामीन अर्ज फेटाळला.

कडक सुरक्षेमध्ये न्यायालयात हजर:

सकाळी ११:४० च्या सुमारास सर्वोच्च न्यायालयाचे ११ वकील, वकील अपूर्व कुमार भट्टाचार्य यांच्या नेतृत्वाखाली दोन मिनी बसने पोलिस बंदोबस्तात न्यायालयाच्या आवारातून बाहेर पडले. यापूर्वी ३ डिसेंबर २०२४ रोजी चितगाव न्यायालयाने जामीन सुनावणी २ जानेवारी २०२५ रोजी निश्चित केली होती. परंतु वकील अधिकाराचा अभाव आणि वकिलांच्या अनुपस्थितीमुळे अर्ज फेटाळण्यात आला होता.

बांगलादेशच्या ध्वजाला अपमानित केल्याचा आरोप झाल्यानंतर त्यांच्या अटकेसाठी बांगलादेशमध्ये सातत्याने निदर्शने झाली. त्यानंतर देशद्रोहाचा गुन्हा दाखल करून हिंदू साधू चिन्मय कृष्ण दास यांना २५ नोव्हेंबर रोजी ढाका येथील हजरत शाहजलाल आंतरराष्ट्रीय विमानतळावर अटक करण्यात आली.

परंतु बांगलादेश हिंदू बौद्ध ख्रिश्चन युनायटेड कौन्सिल (BHBCOP) ने २९ डिसेंबर २०२४ रोजी चिन्मय दास यांच्याविरुद्ध दाखल करण्यात आलेला खटला खोटा असून, चिन्मय दास यांना त्रास देण्याच्या उद्देशाने अटक करण्यात आली आहे, असा आरोप केला आहे.