Asian Games 2026: नागोयामध्ये बसला उशीर, खेळाडू हॉटेलवरच अडकले (WATCH)

एशियन गेम्स २०२६ मध्ये नागोया इथं एका रस्ते अपघातामुळे वाहतुकीचा बोजवारा उडाला. बसला उशीर झाल्याने अनेक देशांचे नेमबाज हॉटेलवरच अडकले. मात्र, भारतीय क्रीडा मंत्रालयाने तातडीने खाजगी वाहनांची सोय केली. या गोंधळातही भारताने नेमबाजी आणि तिरंदाजीत सुवर्णपदकांची लयलूट केली.

बुधवार, ३० सप्टेंबरच्या सकाळी नागोयामध्ये अनेक देशांच्या नेमबाजांना वाहतुकीच्या मोठ्या गोंधळाचा सामना करावा लागला. एका रस्ते अपघातामुळे अधिकृत शटल बसला उशीर झाला. त्यामुळे खेळाडूंना आपल्या हॉटेलवरच ताटकळत बसावं लागलं.

आयची प्रीफेक्चरल जनरल शूटिंग गॅलरीमध्ये नेमबाजीचे दोन महत्त्वाचे इव्हेंट सुरू होते. यात पुरुषांची २५ मीटर रॅपिड-फायर पिस्तूल स्टेज १ आणि ट्रॅप मिक्स्ड टीम इव्हेंटचा समावेश होता. नीरू धांडा आणि कायनान चेनाई या भारतीय जोडीने ट्रॅप मिक्स्ड टीममध्ये ३४ असा विक्रमी स्कोअर करत सुवर्णपदकावर मोहोर उमटवली.

नेमबाजीचे सामने आता अंतिम टप्प्यात आले आहेत. बुधवारी पुरुषांची २५ मीटर रॅपिड-फायर पिस्तूल स्टेज १ स्पर्धा पार पडली. दुसरीकडे, ट्रॅप मिक्स्ड टीम इव्हेंट आधीच संपला असून, भारताने या स्पर्धेत आपलं नववं सुवर्णपदक खिशात घातलं आहे.

बसला उशीर झाल्याने नेमबाज हॉटेलवरच अडकले

आयची-नागोयामध्ये सुरू असलेल्या एशियन गेम्स २०२६ मध्ये आधीपासूनच व्यवस्थापन, खेळाडूंची राहण्याची सोय आणि वाहतुकीवरून बरीच टीका होत आहे. त्यातच आता या नव्या वाहतूक गोंधळामुळे पदकासाठी तयारी करणाऱ्या खेळाडूंचं टेन्शन विनाकारण वाढलं.

रिपोर्ट्सनुसार, एका रस्ते अपघातामुळे स्थानिक मार्गांवर मोठी वाहतूक कोंडी झाली. यामुळे अनेक देशांचे नेमबाज हॉटेलच्या लॉबीमध्येच अडकून पडले. बसची वेळ निघून गेली तरी पर्यायी वाहनाची कोणतीही सोय नव्हती. सकाळी ८:४० वाजताच खेळाडू निघण्यासाठी तयार होते, पण ठरलेली बस ८:४५ उलटून गेले तरी आलीच नाही. त्यामुळे खेळाडूंना लॉबीमध्येच वाट पाहत बसावं लागलं.

शूटिंग रेंजजवळ झालेल्या या अपघातामुळे रस्त्यावर वाहनांच्या लांबच लांब रांगा लागल्या होत्या. याच ट्रॅफिकमध्ये अधिकृत शटल बसेस अडकल्याने खेळाडूंना वेळेवर पोहोचायला उशीर झाला.

या सगळ्या गोंधळात भारतीय क्रीडा मंत्रालयाने तातडीने पावलं उचलली. त्यांनी भारतीय नेमबाजांसाठी खासगी वाहनांची सोय केली. अधिकृत बसची वाट न पाहता, भारतीय खेळाडू वेळेवर आणि विनाअडथळा शूटिंग रेंजवर पोहोचतील याची काळजी मंत्रालयाने घेतली.

याआधी पाकिस्तानचा व्हॉलीबॉल कर्णधार मुराद जहान यानेही आयोजकांच्या भोंगळ कारभारावर ताशेरे ओढले होते. उझबेकिस्तानविरुद्धच्या ग्रुप स्टेज मॅचसाठी बसने त्यांना मूळ ठिकाणाऐवजी भलत्याच ठिकाणी नेल्याचा धक्कादायक प्रकार त्याने उघडकीस आणला होता.

एशियन गेम्सच्या ११ व्या दिवशी भारतावर सुवर्णपदकांचा वर्षाव

सकाळच्या या वाहतूक गोंधळामुळे भारतीय खेळाडूंचा उत्साह अजिबात कमी झाला नाही. नीरू धांडा आणि कायनान चेनाई या भारतीय जोडीने उत्कृष्ट खेळ करत सुवर्णपदकावर आपलं नाव कोरलं.

आयची-नागोया एशियन गेम्समध्ये नेमबाजीत भारताचं हे तिसरं सुवर्ण आणि एकूण १५ वं पदक ठरलं. यामुळे भारताची पदकतालिका आणखी मजबूत झाली आहे. नेमबाजीसोबतच भारतीय तिरंदाज आणि ॲथलेटिक्समधील खेळाडूंनीही पदकांच्या संख्येत मोलाची भर घातली आहे.

स्पर्धेच्या ११ व्या दिवशी भारतीय तिरंदाजी संघाने तब्बल तीन सुवर्णपदकं जिंकली. यामध्ये कंपाउंड मिक्स्ड टीम, महिलांची कंपाउंड टीम आणि पुरुषांच्या कंपाउंड टीमचा समावेश आहे. या तिन्ही प्रकारांत सुवर्णपदक जिंकत भारताने ऐतिहासिक कामगिरी नोंदवली.

या चार सुवर्णपदकांसह भारताच्या एकूण पदकांची संख्या आता ५९ वर पोहोचली आहे. यात १० सुवर्ण, २१ रौप्य आणि कांस्यपदकांचा समावेश आहे. या कामगिरीसह भारत पदक तालिकेत सातव्या स्थानावर पोहोचला आहे. तर दुसरीकडे चीन (२६९), यजमान जपान (१९१) आणि दक्षिण कोरिया (९९) हे देश पदकतालिकेत आघाडीवर आहेत.