Akasa Air : अकासा एअरची सौदी अरेबियाची विमानसेवा या कारणास्तव स्थगित

सुरक्षेच्या कारणास्तव अकासा एअरने जेद्दाह आणि रियाधसाठीची आपली विमानसेवा नोव्हेंबर २०२६ पर्यंत स्थगित केली आहे.

मुंबई : सौदी अरेबियातील सध्याची सुरक्षा परिस्थिती पाहता, अकासा एअरने जेद्दाह आणि रियाधला जाणारी आणि तिथून येणारी विमानसेवा स्थगित केली आहे. शुक्रवारी एअरलाइनने ही माहिती दिली. जेद्दाहची उड्डाणे १० नोव्हेंबरपर्यंत तर रियाधची उड्डाणे ३० नोव्हेंबरपर्यंत रद्द राहतील. २३ ऑक्टोबरला 'एक्स' (X) वर पोस्ट करत कंपनीने सांगितलं की, सौदी अरेबियातील सुरक्षेचा आढावा घेतल्यानंतरच हा निर्णय घेण्यात आला आहे.

एअरलाइनने स्पष्ट केलंय की, "सौदी अरेबियातील सुरक्षेची स्थिती आणि सुरक्षिततेच्या वातावरणाचा काळजीपूर्वक अभ्यास करून आम्ही विमानसेवा स्थगित करण्याचा निर्णय वाढवला आहे. जेद्दाहसाठीची उड्डाणे १० नोव्हेंबर २०२६ पर्यंत आणि रियाधसाठीची उड्डाणे ३० नोव्हेंबर २०२६ पर्यंत रद्द राहतील."

प्रवाशांसाठी मदत आणि सुरक्षिततेचे उपाय

अकासा एअरने सांगितलं की ते तिथल्या परिस्थितीवर बारकाईने लक्ष ठेवून आहेत. ज्या प्रवाशांची उड्डाणे रद्द झाली आहेत, त्यांना पूर्ण परतावा (रिफंड) मिळेल. हा परतावा सात दिवसांच्या आत त्यांच्या मूळ पेमेंट खात्यात जमा होईल. याशिवाय, प्रवाशांना कोणत्याही अतिरिक्त शुल्काविना त्यांच्या प्रवासाच्या तारखा बदलता येतील. ज्यांनी ट्रॅव्हल एजंट्सच्या माध्यमातून बुकिंग केलंय, त्यांनी थेट त्यांच्याशी संपर्क साधावा, असा सल्ला देण्यात आला आहे. "प्रवासी आणि आमच्या कर्मचाऱ्यांची सुरक्षा हीच आमची प्राथमिकता आहे," असंही अकासा एअरने म्हटलंय.

सरकारची भूमिका आणि तिथली परिस्थिती

सौदी अरेबियातील नागरी आणि महत्त्वाच्या पायाभूत सुविधांवर हल्ले होत असल्याच्या पार्श्वभूमीवर हा निर्णय घेण्यात आला आहे. दरम्यान, परराष्ट्र मंत्रालयाने (MEA) शुक्रवारी सांगितलं की, सौदी अरेबियातील भारतीय दूतावास आणि वाणिज्य दूतावास तिथल्या एअरलाइन्स आणि टूर ऑपरेटर्सच्या संपर्कात आहेत. सौदीत अडकलेल्या भारतीय यात्रेकरूंना मायदेशी परत आणण्यासाठी ते प्रयत्न करत आहेत.

नवी दिल्लीत पत्रकारांशी बोलताना परराष्ट्र मंत्रालयाचे प्रवक्ते रणधीर जयस्वाल यांनी माहिती दिली की, गेल्या आठवड्यात उमराहसाठी गेलेले सुमारे ३,००० अडकलेले यात्रेकरू भारतात परतले आहेत. याशिवाय, इतर १०,००० हून अधिक उमराह यात्रेकरू उपलब्ध विमानांनी मायदेशी परतले आहेत. ते पुढे म्हणाले की, भारतीय दूतावास इतर यात्रेकरूंना लवकरात लवकर परत आणण्यासाठी चर्चा करत असून स्थानिक स्वयंसेवकांच्या मदतीने त्यांना आधार दिला जात आहे.

रियाध आणि जेद्दाहमध्ये दूतावासाने २४ तास सुरू असणारे कंट्रोल रूम्स सुरू केले आहेत. भारतीयांना परिस्थितीची माहिती देण्यासाठी नियमित सूचनाही जारी केल्या जात आहेत. याआधी, २१ ऑक्टोबरला दम्माममधील किंग फहद आंतरराष्ट्रीय विमानतळ आणि सौदी अरामकोच्या शयबाह तेल क्षेत्रावर झालेल्या हल्ल्यांचा परराष्ट्र मंत्रालयाने निषेध केला होता. मंत्रालयाच्या माहितीनुसार, दम्माम विमानतळावरील घटनेत एका भारतीयाचा मृत्यू झाला असून दोन जण जखमी झाले आहेत. तर शयबाह तेल क्षेत्रावरील हल्ल्यात आणखी एक भारतीय नागरिक जखमी झाला आहे. भारताने नागरी आणि महत्त्वाच्या सुविधांवरील हल्ले तात्काळ थांबवण्याचं आवाहन केलं असून, या भागात लवकरच शांतता प्रस्थापित होईल अशी आशा व्यक्त केली आहे.