६व्या शतकातील जहाजाच्या अवशेषांचा शोध

इटलीच्या सिसिली किनाऱ्यावर सहाव्या शतकातील जहाजाचे अवशेष सापडल्याने पुरातत्व संशोधकांमध्ये उत्साह निर्माण झाला आहे. सिसिलीतील रागुसा प्रांतातील इस्पिका म्युनिसिपालिटीमधील सांता मारिया डेल फोक्लो किनाऱ्याजवळ हा ऐतिहासिक शोध लागला आहे. समुद्राखाली उत्खनन करणाऱ्या संशोधकांनी हा दुर्मिळ शोध लावला आहे. इ.स.पूर्व ६-५ व्या शतकातील जहाजाच्या अवशेषांसह चार दगडी आणि दोन लोखंडी नौकाबंध संशोधकांना सापडले.

समुद्राच्या पृष्ठभागापासून अवघ्या सहा मीटर खोलीवर हा शोध लागला. हे अवशेष समुद्रातील खडकाळ आणि वाळूच्या भागात गाडलेल्या अवस्थेत होते असे अहवाल सांगतात. सापडलेल्या जहाजाचा भाग 'सु गुस्सिओ' (su guscio) तंत्रज्ञानाचा वापर करून बनवण्यात आला होता असे उत्खननाचे नेतृत्व करणाऱ्या संशोधकांनी सांगितले. जहाजासाठी वापरलेल्या फळ्या क्लॅम्प्सच्या साहाय्याने जोडण्यात आल्या होत्या. हे त्या काळातील जहाजबांधणीतील प्रगती दर्शवते. याच ठिकाणाहून सापडलेले 'T' आकाराचे लोखंडी नौकाबंध इ.स. सातव्या शतकातील आहेत असे ओळखण्यात आले. सापडलेल्या चार दगडी नौकाबंधांना प्रागैतिहासिक काळापर्यंतचा इतिहास असू शकतो असा अंदाज आहे.

अंडरवॉटर फोटोग्रामेट्री (underwater photogrammetry) सारख्या आधुनिक तंत्रज्ञानाचा वापर करून उडाइन विद्यापीठातील संशोधकांनी समुद्रात उत्खनन केले. त्याचबरोबर इतर अत्याधुनिक तंत्रज्ञानाचाही या संशोधनासाठी वापर करण्यात आला. अधिक अभ्यासासाठी नमुने गोळा केले असून त्याद्वारे त्या काळातील जहाजबांधणीसाठी वापरल्या जाणाऱ्या लाकडांची माहिती मिळेल असा दावा संशोधकांनी केला आहे. प्राचीन ग्रीसशी व्यापार करण्यासाठी सिसिली हे एक महत्त्वाचे बंदर होते. हा नवीन शोध त्या काळातील जहाजबांधणी, सागरी वाहतूक आणि व्यापारी संबंधांबद्दल अधिक माहिती देईल असे संशोधक सांगतात.