Iran Crisis : इराणला मोठा झटका, 12 अरब देश एकवटले, सौदी अरेबियाचा थेट इशारा

12 Arab Nations Unite Against Iran : मध्य पूर्वेत इराणच्या लष्करी कारवायांविरोधात आखाती देश आक्रमक झाले आहेत. या भागातील शांतता भंग करणाऱ्या कारवाया थांबवाव्यात, अशी मागणी अरब देशांनी केली आहे. 

12 Arab Nations Unite Against Iran : मध्य पूर्वेत इराणच्या लष्करी कारवायांविरोधात आखाती देशांमध्ये संताप वाढत आहे. सशस्त्र गटांना शस्त्रे आणि पैसा पुरवून भागातील शांतता धोक्यात आणण्याचे काम इराणने तात्काळ थांबवावे, अशी मागणी १२ आखाती-अरब-इस्लामिक देशांनी एकत्र येऊन केली आहे. तसेच, तेल शुद्धीकरण प्रकल्प (रिफायनरी) आणि तेल क्षेत्रांवर हल्ला केल्यास त्याचा परिणाम जागतिक इंधन बाजारावर होईल आणि याचे गंभीर परिणाम भोगावे लागतील, असा थेट इशारा सौदी अरेबियाने दिला आहे.

कतारमधील रास लफान इंडस्ट्रियल सिटीमध्ये झालेल्या हल्ल्यात मोठे नुकसान झाल्याची माहिती कतार एनर्जीने दिली आहे. या हल्ल्यात गॅस-टू-लिक्विड (GTL) प्लांटचे मोठे नुकसान झाले आहे. होरमुझच्या सामुद्रधुनीला असलेला धोका संपवावा आणि बाब अल-मंदाब सामुद्रधुनी बंद करण्याचा प्रयत्न करू नये, असेही अरब देशांनी स्पष्ट केले आहे. दरम्यान, हा तणाव कमी करण्यासाठी पाकिस्तान, इजिप्त आणि तुर्की हे देश इराणसोबत थेट चर्चा करत आहेत.

दुसरीकडे, होरमुझच्या सामुद्रधुनीमध्ये अडकलेल्या भारतीय तेल टँकर आणि मालवाहू जहाजांच्या सुरक्षित प्रवासासाठी भारताने आपले राजनैतिक प्रयत्न अधिक वेगवान केले आहेत. सध्या भारताची २१ जहाजे होरमुझच्या सामुद्रधुनीमध्ये अडकली असून, त्यात ६११ भारतीय कर्मचारी आहेत. या जहाजे आणि कर्मचाऱ्यांना सुरक्षित बाहेर काढण्यासाठी भारत सरकार प्रयत्नशील आहे. भारताने पाठवलेल्या औषधांबद्दल इराण सरकारने आभार मानले आहेत. ही औषधे इराणच्या रेड क्रेसेंट संस्थेला दिली जाणार असून, ती सीमेवरील देशांमार्गे रस्त्याने इराणमध्ये पोहोचवली जातील. दरम्यान, युद्धाच्या परिस्थितीत इंधनाची कमतरता भासू नये म्हणून केंद्र सरकारने देशातील एलपीजी उत्पादनात ४० टक्क्यांनी वाढ केली आहे. याआधी अडकलेल्या दोन एलपीजी टँकरना जाण्यासाठी इराणने परवानगी दिली होती.