Plant Care: तुमच्या झाडांची पानं वळतायत? हे ५ घरगुती उपाय करून बघा, झाडं होतील एकदम फ्रेश!

Plant Care झाडांना होणाऱ्या 'लीफ कर्ल' आजारामुळे पानं कमजोर होतात आणि त्यांची वाढ खुंटते. यामागे काय कारणं आहेत आणि त्यावर कोणते सोपे घरगुती उपाय करता येतील, हे जाणून घेऊया.

Plant Care आपण कितीही काळजी घेतली तरी कधीकधी झाडांची पानं नीट वाढत नाहीत आणि झाड कोमेजल्यासारखं दिसतं. तुमच्या झाडांची पानं कधी अशी वळलेली किंवा आकसलेली दिसली आहेत का? याला 'लीफ कर्ल' (Leaf Curl) म्हणतात. यात पानं विचित्र पद्धतीने वळतात, आकसतात किंवा वर-खाली गुंडाळली जातात. टोमॅटो, मिरची, लिंबू आणि गुलाब यांसारख्या भाजीपाला, फुलझाडं आणि फळझाडांमध्ये ही समस्या सर्रास दिसते. याचं मुख्य कारण म्हणजे कीटक आणि व्हायरस. मावा (Aphids), पांढरी माशी (White fly) आणि कोळी (Mites) यांसारखे छोटे कीटक झाडांच्या पानांमधला रस शोषून घेतात. त्यामुळे पानं कमजोर होऊन वळायला लागतात. चला, तर मग पाहूया या समस्येवर कोणते घरगुती उपाय करता येतील.

लीफ कर्ल दूर करण्यासाठी घरगुती उपाय

तुम्ही घरातल्या घरात काही सोपे उपाय करून झाडांना किडींपासून वाचवू शकता आणि पानांची चांगली वाढ सुनिश्चित करू शकता. जाणून घेऊया 'लीफ कर्ल'ची समस्या कशी सोडवायची.

हळद आणि लसणाचा वापर

झाडांवरच्या किडींना दूर ठेवण्यासाठी तुम्ही हळद आणि लसणाच्या पाण्याची फवारणी करू शकता. यांच्या तीव्र वासामुळे आणि गुणधर्मांमुळे झाडांना इन्फेक्शन होत नाही.

कडुलिंबाच्या तेलाची फवारणी

१ लिटर पाण्यात कडुलिंबाच्या तेलाचे ४-५ थेंब मिसळा. हे मिश्रण आठवड्यातून दोन वेळा पानांवर फवारा. यामुळे 'लीफ कर्ल'ची समस्या दूर होईल. हे तेल किडींना दूर ठेवतं आणि झाड निरोगी राहतं.

मावा आणि कोळी घालवण्यासाठी सोपी ट्रिक

झाडांच्या पानांवर मावा (Aphids) आणि कोळी (Mites) सहजपणे वाढतात. त्यांना घालवण्यासाठी १ लिटर पाण्यात १ चमचा लिक्विड साबण मिसळून फवारा. यामुळे हे कीटक मरतात आणि झाड निरोगी राहतं.

ताकाचा वापर

ताक आणि पाणी १:२ या प्रमाणात एकत्र करून स्प्रे बॉटलमध्ये भरा आणि झाडांवर फवारा. यामुळे झाडांमधील व्हायरल इन्फेक्शन पसरण्यापासून रोखण्यास मदत होते.

योग्य पाणी आणि सूर्यप्रकाश

झाडांना पाणी देताना विशेष काळजी घेणं गरजेचं आहे. सकाळचं कोवळं ऊन झाडांच्या वाढीसाठी चांगलं असतं. या काही सोप्या गोष्टी लक्षात ठेवल्यास तुम्ही 'लीफ कर्ल'च्या समस्येपासून सुटका मिळवू शकता.