Flight Safety : टेकऑफ आणि लँडिंगच्या वेळी विमानातले लाईट्स का बंद करतात?

तुम्ही कधी विमानातून प्रवास केला असेल, तर एक गोष्ट नक्की नोटीस केली असेल. टेकऑफ आणि लँडिंगच्या वेळी विमानातले लाईट्स बंद केले जातात. पण असं का करतात, हे तुम्हाला माहितीये का? यामागे काही खास कारणं आहेत.

विमानातले लाईट्स का बंद करतात?

विमानातून प्रवास करताना तुम्ही एक गोष्ट नक्की पाहिली असेल. विमान टेकऑफ करताना आणि लँडिंगच्या वेळी केबिनमधले लाईट्स बंद केले जातात. प्रवाशांना शांत वाटावं म्हणून असं करतात, असा अनेकांचा समज असतो. पण यामागे सुरक्षेचं एक महत्त्वाचं कारण आहे. टेकऑफ आणि लँडिंगची वेळ खूप महत्त्वाची असते. या वेळी अचानक काही अडचण आली, तर प्रवाशांना तातडीने बाहेर काढावं लागतं. अशा परिस्थितीचा विचार करूनच विमान कर्मचारी ही काळजी घेतात.

प्रवाशांना तयार करण्यासाठी

विमानातले लाईट्स कमी केल्यामुळे प्रवाशांच्या डोळ्यांना कमी प्रकाशाची सवय होते. आपण जास्त प्रकाशातून अचानक अंधारात गेलो, तर डोळ्यांना स्पष्ट दिसायला थोडा वेळ लागतो. आणीबाणीच्या वेळी हा उशीर महागात पडू शकतो. म्हणूनच केबिनमधले लाईट्स आधीच कमी केले जातात. यामुळे बाहेर अंधार असला तरी प्रवाशांना आजूबाजूचा परिसर ओळखायला सोपं जातं. विमानातला वीजपुरवठा खंडित झाला तरी ही काळजी उपयोगी पडते. विशेषतः रात्रीच्या प्रवासात याचा खूप फायदा होतो.

इमर्जन्सी दरवाजे स्पष्ट दिसण्यासाठी

विमानात आणीबाणीची परिस्थिती निर्माण झाली, तर बाहेर पडण्यासाठी खास दरवाजे असतात. ते ओळखण्यासाठी एक्झिट बोर्ड आणि जमिनीवर इमर्जन्सी लाईट्स लावलेले असतात. केबिनमधला प्रकाश कमी झाल्यावर हे लाईट्स अगदी स्पष्ट दिसतात. यामुळे प्रवाशांना सुरक्षित बाहेर पडण्याचा रस्ता पटकन सापडतो. खिडक्यांचे पडदे उघडे ठेवल्यामुळे कर्मचाऱ्यांना बाहेरची परिस्थितीही पाहता येते. समजा एका बाजूला आग किंवा धूर दिसला, तर तिथून प्रवाशांना न पाठवता दुसरा रस्ता निवडता येतो. लाईट्स कमी करणं ही छोटी गोष्ट वाटत असली, तरी प्रवाशांच्या सुरक्षेसाठी ती खूप महत्त्वाची असते.