भारतात Volvo EX60 Electric जानेवारीत करणार तहलका, वाचा फिचर्स आणि किंमत किती असेल?

Volvo EX60 Electric : प्रसिद्ध लक्झरी कार उत्पादक कंपनी व्होल्वो आपली तिसरी इलेक्ट्रिक कार, EX60 मॉडेल, २१ जानेवारी २०२६ रोजी भारतात लॉन्च करणार आहे. ही सध्या विक्रीत असलेल्या XC60 SUV ची पूर्णपणे इलेक्ट्रिक आवृत्ती आहे.

Volvo EX60 Electric : स्वीडनस्थित प्रसिद्ध लक्झरी कार उत्पादक कंपनी व्होल्वो, भारतीय इलेक्ट्रिक वाहन (EV) बाजारात आपला हिस्सा अधिक मजबूत करण्याच्या उद्देशाने एक नवीन मॉडेल सादर करण्याच्या तयारीत आहे. २१ जानेवारी २०२६ रोजी, व्होल्वो आपली तिसरी इलेक्ट्रिक कार EX60 मॉडेल भारतात लॉन्च करणार असल्याची अधिकृत घोषणा करण्यात आली आहे. ही सध्या विक्रीत असलेल्या XC60 SUV मॉडेलची पूर्णपणे इलेक्ट्रिक आवृत्ती आहे.

व्होल्वो EX60 ही प्रीमियम मिड-साईज एसयूव्ही प्रकारातील गाडी असल्याने, भारतीय ग्राहकांकडून तिला चांगला प्रतिसाद मिळेल अशी अपेक्षा आहे. EX30 आणि EX90 मॉडेल्सच्या यशानंतर, व्होल्वोचे नवीन EX60 मॉडेल त्यांच्या इलेक्ट्रिक वाहनांच्या मालिकेत एक मधला पर्याय म्हणून सादर होईल. या माध्यमातून, कंपनी भारतात आपली EV विक्री वाढवण्याची आणि प्रीमियम वाहन विभागात आपले स्थान मजबूत करण्याची योजना आखत आहे.

कंपनीने प्रसिद्ध केलेल्या टीझर फोटोमध्ये, व्होल्वोचे पारंपरिक सिग्नेचर हेडलॅम्प आणि टेललॅम्प डिझाइन स्पष्टपणे दिसतात. जरी ही सध्याच्या XC60 ICE मॉडेलसारखी दिसत असली तरी, डिझाइनमध्ये काही महत्त्वाचे बदल करण्यात आले आहेत. थोडे कॉम्पॅक्ट, आधुनिक क्रॉसओवर प्रकारचे डिझाइन अधिक आकर्षक दिसेल.

व्होल्वोच्या भविष्यातील एसयूव्ही डिझाइनची नवीन दिशा EX60 मधून स्पष्टपणे दिसून येते. तिचे एरोडायनॅमिक डिझाइन, स्लिम एलईडी दिवे आणि नवीन ग्रिल रचना गाडीला एकाच वेळी स्टायलिश आणि तांत्रिकदृष्ट्या प्रगत लुक देतात.

भारतातच तयार होईल व्हॉल्वो

जागतिक बाजारपेठेसाठी EX60 स्वीडनमधील गोटेनबर्गजवळील टॉर्सलांडा प्लांटमध्ये तयार केली जाईल. तथापि, भारतासारख्या महत्त्वाच्या वाढत्या बाजारपेठांमध्ये ही गाडी स्थानिक पातळीवर असेंबल करण्याची व्होल्वोची योजना असल्याचे समजते. यामुळे किंमत कमी होऊन ग्राहकांना स्पर्धात्मक दरात गाडी उपलब्ध करून देण्यास मदत होईल.

सध्या व्होल्वो EX60 ची भारतातील किंमत आणि उपलब्धतेबद्दल अधिकृत माहिती जाहीर केलेली नाही. व्होल्वो भारतात आधी EX90 मॉडेल लॉन्च करेल आणि त्यानंतर EX60 स्थानिक पातळीवर असेंबल करण्याची शक्यता असल्याचे कंपनीने आधीच सूचित केले आहे.

एवढी असेल किंमत

सध्याच्या माहितीनुसार, व्होल्वो EX60 मॉडेलची भारतातील एक्स-शोरूम किंमत सुमारे ६७ लाख रुपये असण्याची शक्यता आहे. मिड-रेंज लक्झरी इलेक्ट्रिक एसयूव्ही शोधणाऱ्या ग्राहकांसाठी हा एक उत्तम पर्याय ठरू शकतो.