Vivo Y6a: Vivo चा नवा धमाका! लाँच केला ७,२००mAh ची अवाढव्य बॅटरी असलेला स्मार्टफोन, पाहा किंमत आणि फीचर्स
सार
स्मार्टफोन बनवणारी प्रसिद्ध कंपनी विवोने (Vivo) आपला नवीन Y6a मॉडेल चीनमध्ये लाँच केला आहे. या फोनची सर्वात मोठी खासियत म्हणजे यात तब्बल 7,200mAh ची जंबो बॅटरी आहे. सोबतच 50 मेगापिक्सेल कॅमेरा, 120Hz रिफ्रेश रेटवाला डिस्प्ले आणि स्नॅपड्रॅगन 4 जेन 2 चिपसेटसारखे फीचर्सही मिळतात. या फोनला IP68 आणि IP69 रेटिंगसुद्धा आहे.
टेक विश्वात सध्या विवो (Vivo) कंपनीच्या आगामी प्रीमियम फोल्डेबल स्मार्टफोन Vivo X Fold 6 ची जोरदार चर्चा सुरू आहे. मात्र, हा महागडा फोल्डेबल फोन लाँच करण्यापूर्वीच विवोने गुपचूप एक मोठा गेम केला आहे. कंपनीने आपल्या लोकप्रिय 'Y-सीरीज'चा विस्तार करत चीनच्या बाजारात Vivo Y6a हा शक्तिशाली स्मार्टफोन सादर केला आहे. या फोनमध्ये तब्बल ७,२००mAh ची अवाढव्य बॅटरी देण्यात आली असून, हा फोन बाजारात धुमाकूळ घालण्यास सज्ज झाला आहे.
चीनमध्ये हा फोन 8GB रॅम आणि 256GB स्टोरेजच्या एकाच व्हेरिएंटमध्ये लाँच करण्यात आला आहे. त्याची किंमत 1,999 चायनीज युआन (अंदाजे 28,000 रुपये) आहे. हा फोन गॅलेक्सी सिल्व्हर, ऑब्सीडियन ब्लॅक आणि फिनिक्स वेल्कम्स गोल्ड या तीन रंगांमध्ये उपलब्ध आहे. Vivo Y6a अँड्रॉइड 16 वर आधारित Okhijin OS 6 ऑपरेटिंग सिस्टीमवर चालतो. फोनमध्ये 6.75 इंचाचा HD+ LCD डिस्प्ले आहे, जो 120Hz रिफ्रेश रेट आणि 1,200 निट्सच्या पीक ब्राइटनेसला सपोर्ट करतो. विशेष म्हणजे, या फोनला IP68 आणि IP69 रेटिंग मिळाली आहे, ज्यामुळे तो धूळ आणि पाण्यापासून पूर्णपणे सुरक्षित राहिल, असा कंपनीचा दावा आहे.
परफॉर्मन्ससाठी, या फोनमध्ये क्वालकॉम स्नॅपड्रॅगन 4 जेन 2 चिपसेट वापरण्यात आला आहे. हा प्रोसेसर 4 नॅनोमीटर टेक्नॉलॉजीवर बनलेला आहे. यासोबतच Adreno 613 GPU, 8GB LPDDR4X रॅम आणि 256GB UFS 3.1 स्टोरेज दिले आहे. सुरक्षेसाठी साईड-माउंटेड फिंगरप्रिंट सेन्सर आणि फेस अनलॉकची सोय आहे. फोटोग्राफीसाठी मागे 50 मेगापिक्सेलचा मुख्य कॅमेरा दिला आहे, जो ऑटोफोकस आणि 10x डिजिटल झूमला सपोर्ट करतो. तर समोर 8 मेगापिक्सेलचा सेल्फी कॅमेरा आहे. पुढील आणि मागील दोन्ही कॅमेऱ्यांनी 1080p पर्यंत व्हिडिओ रेकॉर्डिंग करता येते.
या फोनची सर्वात मोठी ओळख म्हणजे त्याची 7,200mAh क्षमतेची बॅटरी, जी 44W वायर्ड फास्ट चार्जिंगला सपोर्ट करते. कनेक्टिव्हिटीसाठी यात 5G, 4G LTE, ड्युअल-बँड वाय-फाय, ब्लूटूथ 4.2, यूएसबी टाइप-सी पोर्ट, जीपीएस आणि इन्फ्रारेड ब्लास्टरसारखे सर्व आवश्यक पर्याय आहेत. सध्या हा फोन फक्त चीनमध्येच लाँच झाला आहे. इतर देशांमध्ये तो कधी उपलब्ध होईल, याबाबत कंपनीने अद्याप कोणतीही अधिकृत घोषणा केलेली नाही.