पुन्हा वैभवची जोरदार फटकेबाजी, 50 चेंडूत 96, शतक हुकले, भारताची दमदार सुरुवात

50 चेंडूत 96 धावा करणाऱ्या वैभवचे सलग दुसरे एकदिवसीय शतक थोडक्यात हुकले. वैभव सूर्यवंशीच्या या खेळीत सात षटकार आणि नऊ चौकारांचा समावेश होता.

बुलावायो: चौदा वर्षीय वैभव सूर्यवंशीची बॅटिंग फटकेबाजी सुरूच आहे. दक्षिण आफ्रिका अंडर-19 संघाविरुद्धच्या युवा एकदिवसीय मालिकेतील शेवटच्या सामन्यात शतक झळकावणाऱ्या वैभवने, अंडर-19 विश्वचषकापूर्वीच्या सराव सामन्यात स्कॉटलंडविरुद्ध स्फोटक अर्धशतक झळकावले. 50 चेंडूत 96 धावा करणाऱ्या वैभवचे सलग दुसरे एकदिवसीय शतक थोडक्यात हुकले. वैभवच्या या खेळीत सात षटकार आणि नऊ चौकारांचा समावेश होता.

स्कॉटलंडविरुद्ध नाणेफेक गमावून प्रथम फलंदाजी करणाऱ्या भारताने वैभवच्या फटकेबाजीच्या जोरावर 20 षटकांत दोन गडी गमावून 175 धावा केल्या आहेत. 39 चेंडूत 39 धावांसह केरळचा खेळाडू आरोन जॉर्ज आणि 12 चेंडूत 10 धावांसह विहान मल्होत्रा ​​क्रीजवर आहेत. 96 धावा करणाऱ्या वैभवची आणि 19 चेंडूत 22 धावा करणाऱ्या कर्णधार आयुष मात्रेची विकेट भारताने गमावली आहे.

नाणेफेक गमावून फलंदाजीला उतरलेल्या भारताला कर्णधार आयुष मात्रे आणि वैभव सूर्यवंशी यांनी स्फोटक सुरुवात करून दिली. सलामीच्या विकेटसाठी दोघांनी 7 षटकांत 70 धावांची भागीदारी केली. यापैकी 42 धावा वैभवच्या बॅटमधून आल्या. आयुष मात्रे बाद झाल्यानंतर वैभवने षटकार मारून 27 चेंडूत आपले अर्धशतक पूर्ण केले. अर्धशतकानंतरही वैभवने फटकेबाजी सुरू ठेवत सलग षटकार मारून 90 धावांचा टप्पा गाठला. मात्र, 96 धावांवर असताना सतराव्या षटकात मनू सरवतच्या चेंडूवर थॉमस नाईटकडे झेल देऊन वैभव बाद झाला. स्कॉटलंडविरुद्धच्या सराव सामन्यानंतर परवा भारताचा इंग्लंड अंडर-19 संघाविरुद्धही सराव सामना आहे.