Denim Decor: फाटलेली जीन्स फेकू नका! या ५ आयडिया वापरून घराला द्या स्टायलिश लुक

तुमच्या जुन्या किंवा फाटलेल्या जीन्स फेकून देणार असाल तर थांबा! त्यापासून तुम्ही कुशन कव्हर, प्लांटर कव्हर, वॉल ऑर्गनायझर, टेबल रनर आणि लॅम्प शेड यांसारख्या ५ सुंदर वस्तू बनवू शकता.

आपल्या कपाटात एक-दोन जुन्या, फाटलेल्या जीन्स पडलेल्या असतातच. आपण एकतर त्या तशाच ठेवून देतो किंवा सरळ फेकून देतो. पण थांबा! डेनिमचं कापड खूप मजबूत आणि दिसायलाही स्टायलिश असतं. त्यामुळे घर सजवण्यासाठी हा एक उत्तम पर्याय आहे. थोडीशी कल्पकता वापरून आणि घरात असलेल्या शिलाई मशीन किंवा गमच्या मदतीने तुम्ही या जुन्या जीन्सपासून घराला सुंदर बनवणाऱ्या वस्तू तयार करू शकता. या आयडिया केवळ बजेटमध्ये बसणाऱ्या नाहीत, तर तुमच्या घराला एक रस्टिक आणि ट्रेंडी लुकसुद्धा देतील.

डेनिम कुशन कव्हर

जुन्या जीन्सचा पायाचा भाग चौकोनी आकारात कापून शिवून घ्या. त्यावर जीन्सचा खिसा असलेला भाग लावा, म्हणजे तो एक डिझाइनसारखा दिसेल. आतमध्ये कुशन टाकताच तुमचं स्टायलिश डेनिम कुशन कव्हर तयार!

जीन्स पॉकेट ऑर्गनायझर

जीन्सचे खिसे कापून घ्या आणि ते एका जाड कापडावर किंवा कार्डबोर्डवर चिकटवा. आता हे तुम्ही भिंतीवर टांगू शकता. यात तुम्ही रिमोट, चाव्या, पेन किंवा इतर लहान-सहान वस्तू ठेवू शकता. हा वॉल ऑर्गनायझर उपयोगी तर आहेच, पण दिसायलाही खूप छान दिसतो.

डेनिम प्लांटर कव्हर

जुन्या जीन्सचा पायाचा भाग कापून तुमच्या कुंडीच्या चारही बाजूंनी गुंडाळा आणि मागच्या बाजूने शिवून किंवा गमने चिकटवून टाका. यामुळे तुमच्या साध्या कुंड्यांना एक नवीन फॅब्रिक कव्हर मिळेल आणि तुमची बाल्कनी किंवा लिव्हिंग रूम अधिक स्टायलिश दिसेल.

टेबल रनर किंवा मॅट

जीन्सचे वेगवेगळे तुकडे पॅचवर्क स्टाईलमध्ये जोडून तुम्ही टेबल रनर बनवू शकता. जर तुकडे लहान असतील, तर जेवणाच्या ताटाखालची मॅट (प्लेसमॅट) तयार करा. डेनिमचं टेक्स्चर लाकडी किंवा पांढऱ्या टेबलवर खूपच क्लासिक दिसतं.

DIY डेनिम लॅम्प शेड

तुमच्या घरातल्या जुन्या लॅम्प शेडवर डेनिमचं कापड चिकटवा किंवा शिवून त्याचं कव्हर बनवा. जेव्हा या डेनिममधून लाईटचा प्रकाश बाहेर पडतो, तेव्हा खोलीत एक सुंदर आणि आरामदायक वातावरण तयार होतं. हे दिसायला अगदी महागड्या डेकोरसारखं वाटतं.