Toyota Hilux : नव्या रुपात आली टोयोटाची दमदार पिकअप, डिझाइन, फीचर्स एकदम जबरदस्त

टोयोटाने आपली लोकप्रिय पिकअप ट्रक 'हायलक्स' नव्या रुपात भारतात लॉन्च केली आहे. याची सुरुवातीची किंमत ₹31.99 लाख आहे.

नवी दिल्ली (28 जुलै): टोयोटाने भारतीय बाजारात धुमाकूळ घालणारी आपली लाइफस्टाइल पिकअप ट्रक 'टोयोटा हायलक्स' (Toyota Hilux) नव्या अवतारात लॉन्च केली आहे. कंपनीने या नवीन हायलक्सची सुरुवातीची एक्स-शोरूम किंमत ₹31.99 लाख ठेवली आहे. नवीन हायलक्सला आकर्षक फ्रंट डिझाइन, आधुनिक इंटीरियर आणि अनेक नवीन टेक्नॉलॉजीवर आधारित फीचर्ससह बाजारात आणलं आहे. असं असलं तरी, गाडीच्या प्रसिद्ध ऑफ-रोडिंग क्षमतेशी कोणतीही तडजोड केलेली नाही. म्हणजेच, ही पिकअप ट्रक खडबडीत आणि डोंगराळ रस्त्यांवर जबरदस्त परफॉर्मन्स देईल, पण आता शहरातल्या रोजच्या वापरासाठी पूर्वीपेक्षा जास्त आरामदायी झाली आहे.

अधिक मस्क्युलर आणि प्रीमियम लूक

नवीन टोयोटा हायलक्सच्या एक्सटीरियर डिझाइनमध्ये (Exterior design) पूर्णपणे बदल करण्यात आला आहे. समोरच्या बाजूला मोठी ग्रिल, नवीन बंपर, नवीन एलईडी हेडलॅम्प आणि अधिक मस्क्युलर फेंडर्स दिले आहेत. या मोठ्या बदलांमुळे गाडीचा लूक पूर्वीपेक्षा अधिक दमदार आणि प्रीमियम दिसतो.

मात्र, गाडीची लांबी, रुंदी आणि उंची यात कोणताही बदल केलेला नाही. पूर्वीप्रमाणेच मोठा कार्गो बेड (बॉडी) उपलब्ध आहे, ज्यामध्ये 500 किलोपर्यंत सामान वाहून नेऊ शकता. सामान चढवणे आणि उतरवणे सोपे व्हावे यासाठी लोड बेडच्या दोन्ही बाजूंना नवीन 'डेक स्टेप्स' (Deck steps) देण्यात आले आहेत.

आरामदायक आणि हायटेक केबिन फीचर्स

नवीन हायलक्स सहा आकर्षक रंगांमध्ये खरेदी करता येईल - ॲटिट्यूड ब्लॅक, इमोशनल रेड, ॲश, सुपर व्हाइट, सल्फर मेटॅलिक आणि प्लॅटिनम पर्ल व्हाइट मेटॅलिक.

इंटीरियरबद्दल बोलायचं झाल्यास, केबिनमध्ये पूर्वीपेक्षा अधिक प्रीमियम आणि ॲडव्हान्स फीचर्स आहेत. डॅशबोर्डची रचना नवीन आणि अतिशय सुंदर आहे. 8 स्पीकर्सच्या सिस्टीमसह 12.3-इंचाची मोठी टचस्क्रीन इन्फोटेनमेंट सिस्टीम दिली आहे. प्रवासादरम्यान सोयीसाठी इन्फोटेनमेंट आणि एसी कंट्रोल्स वेगवेगळे ठेवले आहेत. यामुळे ऑफ-रोडिंग करताना ड्रायव्हरला हे कंट्रोल्स वापरणं खूप सोपं होईल.

खराब रस्त्यांवरही पॉवरफुल परफॉर्मन्स

गाडीच्या मेकॅनिकल बदलांबद्दल बोलायचं झाल्यास, नवीन हायलक्समध्ये पूर्वीचीच मजबूत लॅडर-फ्रेम चेसिस आणि 4-व्हील ड्राइव्ह (4WD) सिस्टीम कायम ठेवली आहे. यासोबतच, इलेक्ट्रिक पॉवर स्टीयरिंग, सुधारित सस्पेन्शन आणि 'मल्टी टेरेन सिलेक्ट सिस्टीम' हे स्टँडर्ड फीचर म्हणून दिले आहेत. यामुळे वेगवेगळ्या प्रकारच्या आणि अत्यंत खराब रस्त्यांवर गाडी चालवणं पूर्वीपेक्षा जास्त सोपं होणार आहे.

शक्तिशाली इंजिन आणि व्हेरिएंट्सची माहिती

नवीन हायलक्समध्ये तेच जुनं आणि विश्वासार्ह 2.8-लीटर टर्बो-डिझेल इंजिन दिलं आहे, जे 201bhp पॉवर आणि 500Nm टॉर्क निर्माण करतं. या इंजिनसोबत 6-स्पीड ऑटोमॅटिक गिअरबॉक्स आणि 4WD सिस्टीम मिळेल. कंपनीने ही पिकअप ट्रक GX आणि VX या दोन मुख्य व्हेरिएंटमध्ये सादर केली आहे. यापैकी GX व्हेरिएंट 4x2 आणि 4x4 या दोन्ही पर्यायांमध्ये उपलब्ध असेल.