Fortuner Price Hike: टोयोटा फॉर्च्युनर पुन्हा महागली; जाणून घ्या नव्या किमती आणि फीचर्स

टोयोटाने फॉर्च्युनरच्या किमतीत ८७,००० रुपयांपर्यंत वाढ केली आहे. आता या गाडीची एक्स-शोरूम किंमत ३४.७६ लाख रुपयांपासून सुरू होते. २०२६ मध्ये येणाऱ्या नव्या फॉर्च्युनरमध्ये ADAS, सनरूफ आणि माइल्ड-हायब्रिड टेक्नॉलॉजीसारखे नवीन फीचर्स मिळण्याची शक्यता आहे.

Toyota Fortuner टोयोटाने आपली लोकप्रिय SUV फॉर्च्युनर पुन्हा एकदा महाग केली आहे. आता या गाडीची एक्स-शोरूम किंमत ३४.७६ लाख रुपयांपासून सुरू होऊन ५०.४६ लाख रुपयांपर्यंत जाते. कंपनीने फॉर्च्युनरच्या किमतीत ८७,००० रुपयांपर्यंत वाढ केली आहे. सर्वात जास्त वाढ टॉप मॉडेल GR-S 4X4 AT व्हेरिएंटमध्ये झाली आहे.

लेजेंडर 4X2, 4X4 MT आणि AT व्हेरिएंटच्या किमती अनुक्रमे ७५,०००, ७८,००० आणि ८३,००० रुपयांनी वाढल्या आहेत. तर 4X4 AT डिझेल माइल्ड हायब्रिड मॉडेल ७५,००० रुपयांनी महाग झालं आहे. फॉर्च्युनरच्या बेस मॉडेल 4X2 AT पेट्रोल व्हेरिएंटची किंमत ६०,००० रुपयांनी वाढली आहे. तसेच, 4X2 MT डिझेल, 4X2 AT डिझेल आणि 4X4 MT डिझेलच्या किमती अनुक्रमे ६०,०००, ६५,००० आणि ६७,००० रुपयांनी वाढल्या आहेत.

नवीन जनरेशनची फॉर्च्युनर लवकरच येणार

मिळालेल्या माहितीनुसार, २०२६ च्या अखेरीस फॉर्च्युनरचं नवीन जनरेशन मॉडेल जागतिक स्तरावर लाँच होण्याची शक्यता आहे. त्यानंतर ते भारतातही येईल. या गाडीच्या टेस्टिंग दरम्यानचे काही फोटो समोर आले आहेत, ज्यात ADAS (Advanced Driver Assistance Systems) साठी लागणारे रडार मॉड्यूल बंपरवर आणि कॅमेरा विंडस्क्रीनमागे दिसला आहे. त्यामुळे नव्या फॉर्च्युनरमध्ये ADAS हे महत्त्वाचे सेफ्टी फीचर मिळण्याची दाट शक्यता आहे.

याशिवाय, नव्या फॉर्च्युनरमध्ये अनेक नवीन फीचर्स मिळू शकतात. यात OTA (ओव्हर-द-एअर) अपडेट्स, व्हेंटिलेटेड आणि पॉवर्ड फ्रंट सीट्स, अपडेटेड कनेक्टिव्हिटी, सनरूफ, मोठी १२.३-इंच टचस्क्रीन सिस्टीम, पूर्णपणे डिजिटल इन्स्ट्रुमेंट क्लस्टर आणि ३६०-डिग्री कॅमेरा यांचा समावेश असू शकतो. सध्याच्या मॉडेलप्रमाणेच, नवीन फॉर्च्युनरमध्येही दोन इंजिन पर्याय मिळतील - १६६bhp क्षमतेचं २.७-लिटर पेट्रोल इंजिन आणि २०४bhp क्षमतेचं २.८-लिटर डिझेल इंजिन. डिझेल इंजिनमध्ये 48V माइल्ड-हायब्रिड सिस्टीम कायम ठेवली जाईल.