Upcoming Car Launches : दिवाळीत नवीन कार घेताय? बाजारात येतायत हे भन्नाट मॉडेल्स

दिवाळीच्या मुहूर्तावर तुम्ही नवीन कार घेण्याचा विचार करत असाल, तर तुमच्यासाठी एक आनंदाची बातमी आहे. मारुती, ह्युंदाई, टाटा आणि महिंद्रासारख्या बड्या कंपन्या त्यांच्या नवीन एसयूव्ही, इलेक्ट्रिक आणि सीएनजी कार्स बाजारात आणत आहेत.

मुंबई : दिवाळीच्या सणासुदीला नवीन कार घेण्याचा प्लॅन करणाऱ्यांसाठी ही बातमी खूप महत्त्वाची आहे. ऑक्टोबरच्या अखेरीस भारतीय ऑटोमोबाईल मार्केटमध्ये अनेक नवीन मॉडेल्स लाँच होणार आहेत. मारुती सुझुकी, ह्युंदाई, टाटा, महिंद्रा, किया, टोयोटा, होंडा, रेनॉल्ट आणि स्कोडा यांसारख्या दिग्गज कंपन्या त्यांच्या नवीन आणि अपडेटेड कार्स ग्राहकांसाठी आणत आहेत.

रेनॉल्ट ट्रायबर टर्बो

नवीन रेनॉल्ट ट्रायबर आता १.० लिटर, ३-सिलेंडर टर्बो पेट्रोल इंजिनसोबत येणार आहे. हे इंजिन १०० पीएस पॉवर आणि १६० एनएम टॉर्क जनरेट करतं. विशेष म्हणजे, रेनॉल्ट कायगरमध्येही याच इंजिनचा वापर केला जातो. ग्राहकांना ही कार मॅन्युअल आणि सीव्हीटी गिअरबॉक्स अशा दोन्ही पर्यायांमध्ये मिळेल.

स्कोडा स्लाव्हिया फेसलिफ्ट

ऑगस्टमध्ये अपडेटेड स्कोडा स्लाव्हियाची झलक पाहायला मिळाली होती. आता ही कार आतून आणि बाहेरून काही डिझाईन बदलांसह येत आहे. यात सर्वात मोठा बदल म्हणजे ८-स्पीड ऑटोमॅटिक गिअरबॉक्स. हा नवीन ८-स्पीड टॉर्क कन्व्हर्टर ऑटोमॅटिक गिअरबॉक्स फक्त १.० लिटर टीएसआय पेट्रोल इंजिनसोबतच मिळेल. या महिन्याच्या अखेरीस ही कार शोरूममध्ये येण्याची शक्यता आहे.

किया कॅरेन्स आणि कॅरेन्स क्लॅव्हिस सीएनजी

किया इंडिया लवकरच कॅरेन्स आणि कॅरेन्स क्लॅव्हिसचे सीएनजी व्हर्जन लाँच करण्याच्या तयारीत आहे. या दोन्ही मॉडेल्समध्ये १.५ लिटर नॅचरली अस्पिरेटेड पेट्रोल इंजिनसोबत फॅक्टरी-फिटेड सीएनजी किट मिळेल. हे सीएनजी इंजिन ९३ बीएचपी पॉवर आणि १२३ एनएम टॉर्क देईल.

महिंद्रा थार फेसलिफ्ट

२०२६ च्या महिंद्रा थार फेसलिफ्टमध्ये थार रॉक्सवरून प्रेरित झालेले अनेक डिझाईन आणि फीचर्स पाहायला मिळतील. यात सध्याचे ११९ बीएचपी १.५ लिटर डिझेल, २.० लिटर टर्बो पेट्रोल आणि २.२ लिटर डिझेल इंजिनचे पर्याय तसेच राहण्याची शक्यता आहे.

ह्युंदाई बेयॉन

ह्युंदाईची भारतातील ही दुसरी मिड-साईझ एसयूव्ही असणार आहे. क्रेटासोबतच या कारची विक्री सुरू राहील असा अंदाज आहे. यात १.५ लिटर नॅचरली अस्पिरेटेड पेट्रोल इंजिनसोबत सीएनजीचा पर्यायही मिळू शकतो. तसेच, मॅन्युअल आणि ऑटोमॅटिक गिअरबॉक्सचे पर्यायही यात मिळतील.

होंडा एलिव्हेट फेसलिफ्ट

होंडा कार्स इंडिया ऑक्टोबर २०२६ मध्ये एलिव्हेट फेसलिफ्ट लाँच करण्याच्या तयारीत आहे. या कारच्या इंटिरिअर आणि एक्सटिरिअरमध्ये काही छोटे बदल पाहायला मिळतील. यात सध्याचे १.५ लिटर नॅचरली अस्पिरेटेड पेट्रोल इंजिन कायम राहील. सोबतच मॅन्युअल आणि सीव्हीटी गिअरबॉक्सचे पर्यायही मिळतील.

टाटा सफारी इलेक्ट्रिक

अॅक्टी.ईव्ही (Acti.ev) प्लॅटफॉर्मवर तयार होणाऱ्या टाटा सफारी इलेक्ट्रिकमध्ये हॅरियर ईव्हीप्रमाणेच ६५kWh आणि ७५kWh चे बॅटरी पॅक मिळू शकतात. ही कार सिंगल चार्जवर ५०० किलोमीटरपेक्षा जास्त रेंज देईल अशी अपेक्षा आहे. यात क्लोज्ड ग्रिल, एअरोडायनॅमिक अलॉय व्हील्स आणि ईव्ही बॅजिंगसारखे खास डिझाईन बदल पाहायला मिळतील.

टोयोटा ग्लान्झा फेसलिफ्ट

२०२६ च्या टोयोटा ग्लान्झा फेसलिफ्टमध्ये नवीन बलेनोसारखे डिझाईन आणि फीचर्स मिळण्याची शक्यता आहे. यात १.२ लिटर, ३-सिलेंडर नॅचरली अस्पिरेटेड पेट्रोल इंजिन दिले जाऊ शकते. हे इंजिन ८१ बीएचपी पॉवर आणि ११२ एनएम टॉर्क जनरेट करेल.

मारुती वॅगनआर फेसलिफ्ट

बलेनोपाठोपाठ आता मारुती सुझुकी वॅगनआरमध्येही नवीन १.२ लिटर, ३-सिलेंडर नॅचरली अस्पिरेटेड पेट्रोल इंजिन मिळण्याची शक्यता आहे. नवीन इंजिनसोबतच कारच्या आत आणि बाहेर काही डिझाईन बदल आणि नवीन फीचर्स पाहायला मिळतील. दिवाळीच्या मुहूर्तावर नवीन कार शोधणाऱ्यांसाठी आता एसयूव्ही, इलेक्ट्रिक, सीएनजी आणि पेट्रोल सेगमेंटमध्ये अनेक उत्तम पर्याय उपलब्ध होणार आहेत.