टाटा एक्सप्रेस:पेट्रोल ट्विन सिलेंडर सीएनजी व्हेरिएंट;फ्लीट मार्केटमध्ये क्रांती

टाटा मोटर्सने आपल्या फ्लीट-केंद्रित एक्सप्रेस श्रेणीमध्ये पेट्रोल आणि ट्विन-सिलेंडर सीएनजी व्हेरिएंट सादर केले आहेत. कमी देखभाल खर्च, सेगमेंट-फर्स्ट 70-लिटर सीएनजी टाकी आणि उत्तम वॉरंटी ही याची वैशिष्ट्ये आहेत. 

भारतातील आघाडीची वाहन उत्पादक कंपनी टाटा मोटर्स पॅसेंजर व्हेइकल्सने आपली फ्लीट-केंद्रित एक्सप्रेस श्रेणी अधिक विस्तारली आहे. कंपनीने नवीन पेट्रोल आणि ट्विन-सिलेंडर सीएनजी व्हेरिएंट सादर केले आहेत. याआधीच उत्तम प्रतिसाद मिळालेल्या एक्सप्रेस इलेक्ट्रिक मॉडेल व्यतिरिक्त, आता अधिक ग्राहक वर्गापर्यंत पोहोचण्याचे कंपनीचे उद्दिष्ट आहे, असे कंपनीने एका प्रसिद्धीपत्रकात म्हटले आहे.

एक्सप्रेस पेट्रोल व्हेरिएंटची सुरुवातीची एक्स-शोरूम किंमत 5.59 लाख रुपये आहे, तर सीएनजी व्हेरिएंटची किंमत 6.59 लाख रुपयांपासून सुरू होते. देशभरातील अधिकृत फ्लीट डीलरशिपवर बुकिंग सुरू झाली आहे. मल्टी-पॉवरट्रेन संकल्पनेचा एक भाग म्हणून, व्यावसायिक फ्लीट ऑपरेटर्सना उच्च कार्यक्षमता आणि कमी खर्चाचे वाहतूक पर्याय उपलब्ध करून देणे हे टाटा मोटर्सचे उद्दिष्ट आहे. निवडक शहरांमध्ये फ्लीट ग्राहकांसाठी विशेष डीलरशिपवर फ्लीट कॅबच्या विक्री आणि सर्व्हिससाठी खास सुविधा उपलब्ध करून देण्यात आली आहे.

फ्लीट ऑपरेटर्ससाठी एक्सप्रेस पेट्रोल आणि सीएनजी व्हेरिएंटवर 3 वर्षे किंवा 1 लाख किलोमीटरपर्यंतची स्टँडर्ड वॉरंटी उपलब्ध आहे. ही वॉरंटी 5 वर्षे किंवा 1.8 लाख किलोमीटरपर्यंत वाढवण्याची सोय देखील आहे. प्रति किलोमीटर फक्त 0.47 रुपये इतका कमी देखभाल खर्च आणि फ्लीट ग्राहकांसाठी खास तयार केलेले आर्थिक पर्याय यामुळे एक्सप्रेस हा या सेगमेंटमधील एक आकर्षक पर्याय बनला आहे.

एक्सप्रेस पेट्रोल आणि सीएनजी व्हेरिएंट 1.2-लिटर रेवोट्रॉन इंजिनसह येतात. मॅन्युअल गिअरबॉक्स असलेली ही वाहने दीर्घकाळ वापर आणि स्थिर कामगिरीसाठी डिझाइन केलेली आहेत. सेगमेंटमध्ये प्रथमच सादर करण्यात आलेली 70-लिटर क्षमतेची ट्विन-सिलेंडर सीएनजी टाकी लांब पल्ल्याच्या प्रवासासाठी सोयीस्कर आहे. यामुळे फ्लीट ऑपरेटर्ससमोरील बूट स्पेस कमी होण्याची मोठी समस्या दूर होते. पेट्रोल व्हेरिएंटमध्ये 419 लिटरची बूट स्पेस देऊन, एक्सप्रेस या सेगमेंटमध्ये सर्वाधिक स्टोरेज क्षमता प्रदान करते.