Tata Sierra Safety: टाटाची आणखी एक '5-स्टार' गाडी! सिएराला सुरक्षेत मिळालं जबरदस्त रेटिंग
सार
Tata Sierra : टाटा सिएरा SUV ने भारत NCAP क्रॅश टेस्टमध्ये 5-स्टार सेफ्टी रेटिंग मिळवलं आहे. प्रौढांच्या सुरक्षेसाठी गाडीला 32 पैकी 31.14 पॉइंट्स, तर लहान मुलांच्या सुरक्षेसाठी 49 पैकी 44.73 पॉइंट्स मिळाले आहेत.
टाटा मोटर्सने पुन्हा एकदा सुरक्षेच्या बाबतीत आपला दबदबा कायम ठेवला आहे. टाटाच्या नव्या सिएरा गाडीने नुकत्याच झालेल्या भारत NCAP (New Car Assessment Program) क्रॅश टेस्टमध्ये पूर्ण 5-स्टार सेफ्टी रेटिंग मिळवलं आहे. या SUV ने प्रौढांच्या सुरक्षेसाठी (Adult Protection) 32 पैकी 31.14 पॉइंट्स आणि लहान मुलांच्या सुरक्षेसाठी (Child Protection) 49 पैकी 44.73 पॉइंट्स मिळवून एक शानदार कामगिरी केली आहे. विशेष म्हणजे, NCAP ने टेस्टसाठी Accomplished+ आणि Adventure+ डिझेल व्हेरिएंट्स पाठवले होते, पण हे 5-स्टार रेटिंग सिएराच्या संपूर्ण रेंजला, म्हणजेच सर्व व्हेरिएंट्सना लागू आहे.
भारत NCAP च्या फ्रंटल ऑफसेट डिफॉर्मेबल बॅरिअर टेस्टमध्ये, टाटा सिएराने ड्रायव्हरच्या डोक्याला, पायांना आणि मांड्यांना 'उत्तम' (Good) संरक्षण दिलं. तर, छाती आणि टिबिया (पायाचा भाग) यांना 'पुरेसं' (Adequate) संरक्षण मिळालं. सह-प्रवाशाच्या सुरक्षेच्या बाबतीतही गाडी मजबूत ठरली. उजव्या पायाच्या टिबिया वगळता, शरीराच्या सर्व महत्त्वाच्या भागांना 'उत्तम' संरक्षण मिळालं. याला 'पुरेसं' रेटिंग देण्यात आलं. साईड इम्पॅक्ट आणि साईड पोल इम्पॅक्ट टेस्टमध्ये तर सिएराने आणखी चांगली कामगिरी केली. यात ड्रायव्हर आणि सह-प्रवाशाच्या शरीराच्या सर्व भागांना 'उत्तम' संरक्षण मिळालं.
लहान मुलांच्या सुरक्षेच्या बाबतीतही सिएराने निराश केलं नाही. ३ वर्षांच्या मुलाच्या डमीला मागच्या बाजूला तोंड करून बसवलेल्या चाईल्ड सीटमध्ये छातीला 'उत्तम' संरक्षण मिळालं आणि गाडी धडकल्यावर डमी जास्त पुढे ढकलली गेली नाही. यासाठी गाडीला ८ पैकी ७.७३ पॉइंट्स मिळाले. तर, १.५ वर्षांच्या मुलाच्या डमीला मागच्या बाजूला तोंड करून बसवलेल्या चाईल्ड सीटमध्ये डोक्याला आणि छातीला 'उत्तम' संरक्षण मिळालं, ज्यात गाडीने ८ पैकी ८ पूर्ण गुण मिळवले. साईड क्रॅश टेस्टमध्ये दोन्ही डमींना ४ पैकी ४ गुण मिळाले. डायनॅमिक स्कोअर २४ पैकी २३.७३ आणि CRS इन्स्टॉलेशन स्कोअर १२ पैकी १२ होता. गाडीचा व्हेईकल असेसमेंट स्कोअर १३ पैकी ९ होता.
आता गाडीच्या सेफ्टी फीचर्सबद्दल बोलूया. टाटा सिएराच्या सर्व व्हेरिएंट्समध्ये स्टँडर्ड म्हणून ६ एअरबॅग्ज, ऑटो होल्डसह इलेक्ट्रॉनिक पार्किंग ब्रेक, EBD सह ABS, चारही चाकांना डिस्क ब्रेक आणि ट्रॅक्शन कंट्रोल यांसारखी फीचर्स मिळतात. तर, टॉप व्हेरिएंट्समध्ये लेव्हल 2 ADAS, 360-डिग्री कॅमेरा, ब्लाइंड स्पॉट मॉनिटरिंग सिस्टीम आणि ऑटो डिमिंग IRVM सारखी ॲडव्हान्स फीचर्स देण्यात आली आहेत.