Tata Nexon 2027 : टाटा नेक्सॉनचं रूप बदलणार; ग्राहकांसाठी मोठं सरप्राईज

२०२७ मध्ये लाँच होणाऱ्या नव्या जनरेशनच्या टाटा नेक्सॉनची सध्या टेस्टिंग सुरू आहे. नव्या ॲटलस प्लॅटफॉर्मवर येणाऱ्या या कारमध्ये भन्नाट डिझाईन आणि आधुनिक इंटिरिअर पाहायला मिळेल. पण, इंजिन मात्र सध्याच्या मॉडेलसारखंच असण्याची शक्यता आहे.

मुंबई : देशातल्या कॉम्पॅक्ट एसयूव्ही मार्केटमध्ये टाटा मोटर्स आता मोठे बदल करत आहे. ४ मीटरपेक्षा कमी लांबीच्या एसयूव्ही सेगमेंटमध्ये टाटा पंच आणि नेक्सॉनचा चांगलाच दबदबा आहे. या वर्षाच्या सुरुवातीलाच पंचचं नवं रूप पाहायला मिळालं होतं. आता टाटा नेक्सॉन पूर्णपणे नव्या अवतारात आणण्याची तयारी सुरू आहे. २०२७ मध्ये येणाऱ्या या नव्या जनरेशन नेक्सॉनची सध्या टेस्टिंग सुरू आहे. या नव्या कारच्या डिझाईन, इंटिरिअर आणि टेक्नॉलॉजीमध्ये मोठे बदल दिसतील. पण, इंजिनचे पर्याय मात्र जुनेच राहण्याची शक्यता आहे.

डिझाईनमध्ये होणार बदल

टेस्टिंगदरम्यान समोर आलेल्या फोटोंनुसार, नव्या नेक्सॉनचा मूळ लूक सध्याच्या मॉडेलसारखाच असेल. ड्युअल-टोन अलॉय व्हील्स, स्लोपिंग रूफ आणि आऊटसाईड रिअर व्ह्यू मिरर्स (ORVMs) तसेच राहतील. पण, कारच्या साईड प्रोफाईलमध्ये थोडे बदल दिसू शकतात. शार्प ए-पिलर, मागचे दरवाजे आणि स्पॉयलर नव्या डिझाईनमध्ये पाहायला मिळतील. याशिवाय, नव्या डिझाईनचे एलईडी टेललाईट्स, बदललेला टेलगेट आणि नवा बंपरही नव्या नेक्सॉनमध्ये मिळू शकतो.

नवा प्लॅटफॉर्म हाच सर्वात मोठा बदल

कारच्या आकारात फारसा बदल होणार नाही. पण, नव्या नेक्सॉनमधला सर्वात मोठा बदल म्हणजे यात मिळणारा नवा 'ॲटलस' (ATLAS - Adaptive Tech Forward Lifestyle Architecture) प्लॅटफॉर्म. हाच प्लॅटफॉर्म सध्या कर्व्ह (Curvv) एसयूव्हीमध्ये वापरला जातोय. वेगवेगळ्या बॉडी स्टाईल्स, पॉवरट्रेन सिस्टीम आणि भविष्यातल्या टेक्नॉलॉजीला सपोर्ट करेल, अशा पद्धतीने हा प्लॅटफॉर्म डिझाईन केलाय. यात क्लाऊड-कनेक्टेड टेक्नॉलॉजीचाही सपोर्ट मिळेल.

नवं इंटिरिअर आणि टेक्नॉलॉजी

नव्या नेक्सॉनमध्ये आधीपेक्षा जास्त आधुनिक इंटिरिअर मिळेल. अपडेटेड युझर इंटरफेससह नवी टचस्क्रीन इन्फोटेनमेंट सिस्टीम आणि नवी केबिन डिझाईन यात पाहायला मिळेल. इलेक्ट्रिकली ॲडजस्टेबल फ्रंट सीट्स, व्हेंटिलेटेड फ्रंट सीट्स आणि पॅनोरमिक सनरूफ यांसारखे भन्नाट फीचर्सही नव्या मॉडेलमध्ये दिले जाण्याची शक्यता आहे.

इंजिनमध्ये मोठे बदल नाहीत

नव्या जनरेशन नेक्सॉनच्या इंजिनमध्ये मोठे बदल होण्याची शक्यता कमीच आहे. सध्याचं १.२ लिटर टर्बो पेट्रोल इंजिन आणि १.५ लिटर टर्बो डिझेल इंजिन यातही कायम राहील, असं रिपोर्ट्समध्ये म्हटलंय. सध्याचे गिअरबॉक्स पर्यायही तसेच राहतील. टाटा याचं सीएनजी व्हर्जनही सुरू ठेवेल. यात कारच्या खाली बसवलेली सीएनजी टँक सिस्टीम वापरली जाईल. यातून २४ किमी/किलो (ARAI प्रमाणित) मायलेज मिळण्याची अपेक्षा आहे.

किंमत ५०,००० रुपयांपर्यंत वाढू शकते

नव्या जनरेशन नेक्सॉनची किंमत सध्याच्या मॉडेलपेक्षा थोडी जास्त असू शकते. रिपोर्ट्सनुसार, ही किंमत ५०,००० रुपयांपर्यंत वाढू शकते. सध्या टाटा नेक्सॉनची एक्स-शोरूम किंमत ७.४० लाख ते १४.४० लाख रुपयांच्या घरात आहे. नव्या मॉडेलची सुरुवातीची किंमत साधारण ८ लाख रुपयांच्या आसपास असू शकते. ह्युंदाई व्हेन्यू, किया सोनेट, मारुती सुझुकी ब्रेझा, स्कोडा कायलाक आणि महिंद्रा XUV 3XO यांसारख्या गाड्यांशी नव्या नेक्सॉनची थेट टक्कर असेल. २०२७ मध्ये नवा प्लॅटफॉर्म, जास्त टेक्नॉलॉजी आणि नव्या डिझाईनसह येणारी नेक्सॉन टाटाच्या कॉम्पॅक्ट एसयूव्ही लाईनअपमधला एक महत्त्वाचा हुकमी एक्का राहील.