Saree Business : सुरतमध्ये फक्त 30 रुपयांत मिळतात साड्या, असा सुरू करा स्वतःचा व्यवसाय

साड्यांचा व्यवसाय सुरू करायचा विचार करताय? मग होलसेल मार्केट कुठे आहे, हा प्रश्न तुम्हालाही पडला असेल. गुजरातच्या सुरतमध्ये साड्यांची किंमत फक्त ३० रुपयांपासून सुरू होते. ३० रुपयांना आणलेली साडी तुम्ही सहज १५० रुपयांना विकून चांगला नफा कमवू शकता.

साड्यांच्या व्यवसायासाठी होलसेल मार्केट

साड्यांचा व्यवसाय सुरू करण्यासाठी गुजरातचे सुरत शहर हे देशातील सर्वात मोठे केंद्र आहे. घरबसल्या व्यवसाय करणाऱ्या महिला, छोटे व्यापारी आणि ऑनलाइन विक्रेत्यांसाठी इथले होलसेल मार्केट खूप फायद्याचे ठरते. सुरत टेक्सटाईल मार्केट आणि न्यू टेक्सटाईल मार्केटमध्ये सिंथेटिक, प्रिंटेड आणि पार्टी वेअर साड्या मिळतात. रिंग रोड मार्केटमध्ये रोजच्या वापराच्या आणि स्वस्त साड्या मिळतात. तर मिलेनियम मार्केट हे ट्रेंडी आणि फॅन्सी साड्यांसाठी प्रसिद्ध आहे. इथे खरेदी करताना साडीचा दर्जा आणि किंमत नक्की तपासून पाहा.

एक साडी फक्त ३० रुपयांना

तुम्हाला अगदी ३० ते ५० रुपयांच्या बजेटमध्ये साड्या हव्या असतील, तर सुरतच्या रिंग रोड परिसरातील मार्केट गाठा. राधा रमण टेक्सटाईल मार्केट, अवध टेक्सटाईल मार्केट आणि बेगमपुरा भागातील कट पीस मार्केटमध्ये या साड्या मिळतात. या साड्या म्हणजे सहसा मिलमधील उरलेला स्टॉक, किरकोळ प्रिंटिंग मिस्टेक असलेल्या साड्या किंवा रस्त्यावर विकण्यासाठी असलेल्या सिंथेटिक साड्या असतात. एवढ्या स्वस्तात साड्या घेताना प्रत्येक साडी स्वतः तपासून घेणे गरजेचे आहे, कारण इथे साड्या बंडलमध्ये विकल्या जातात.

नवीन व्यापाऱ्यांनी घ्यायची काळजी

सुरतमध्ये पहिल्यांदाच खरेदीला जाणाऱ्या नवीन व्यापाऱ्यांनी काही गोष्टींची काळजी घेतली पाहिजे. बाजारात गेल्यावर पहिल्याच दुकानातून खरेदी करू नका. चार-पाच दुकानांमध्ये जाऊन डिझाईन आणि किमतींची तुलना करा. एका डिझाईनच्या किती साड्या घ्याव्या लागतील आणि बंडलमध्ये कोणते रंग मिळतील, हे आधीच विचारून घ्या. खरेदी करण्यापूर्वी पक्के बिल, जीएसटी आणि ट्रान्सपोर्टचा खर्च याबद्दल स्पष्ट माहिती घ्या. स्थानिक ग्राहकांच्या आवडीनुसार साड्या निवडल्यास, कमी गुंतवणुकीत तुम्ही चांगला नफा कमवू शकता.