MHADA Pune Lottery: अनेक दिवसांपासून रखडलेली म्हाडा पुणे विभागातील 4,186 घरांची सोडत अखेर 10 फेब्रुवारी रोजी जाहीर होणार आहे. निवडणूक आचारसंहितेमुळे प्रलंबित असलेली ही प्रक्रिया आता पार पडणार असून, 2.15 लाखांहून अधिक अर्जदारांची प्रतीक्षा संपणार आहे.
पुणे : पुण्यात स्वतःचे हक्काचे घर असावे, असे स्वप्न पाहणाऱ्या नागरिकांसाठी दिलासादायक बातमी आहे. अनेक दिवसांपासून रखडलेली म्हाडाच्या पुणे विभागातील घरांची सोडत अखेर जाहीर करण्यात आली असून, उद्या 10 फेब्रुवारी रोजी दुपारी 12 वाजता ही बहुप्रतिक्षित सोडत काढली जाणार आहे. महापालिका व जिल्हा परिषद निवडणुकांच्या आचारसंहितेमुळे ही प्रक्रिया प्रलंबित होती. मात्र आता आचारसंहिता संपल्यानंतर, जिल्हा परिषद सभागृहात सोडत पार पडणार असून, म्हाडासाठी अर्ज केलेल्या नागरिकांमध्ये प्रचंड उत्सुकता पाहायला मिळत आहे.
26
4,186 सदनिकांसाठी 2.15 लाखांहून अधिक अर्ज
म्हाडाच्या पुणे मंडळाअंतर्गत एकूण 4,186 घरांसाठी 2 लाख 15 हजार 965 अर्ज दाखल झाले आहेत. या सोडतीची जाहिरात 11 सप्टेंबर 2025 रोजी प्रसिद्ध करण्यात आली होती. या योजनेत पुणे आणि पिंपरी-चिंचवड महापालिका क्षेत्रासह पुणे महानगर प्रदेश विकास प्राधिकरणाच्या (PMRDA) हद्दीतील घरांचा समावेश आहे. त्यामध्ये 20 टक्के सर्वसमावेशक गृहनिर्माण योजनेतील 3,322 सदनिका, 15 टक्के सामाजिक गृहनिर्माण योजनेतील 864 सदनिका यांचा समावेश करण्यात आला आहे.
36
अर्जदारांसाठी दोनदा मुदतवाढ
अर्ज भरताना नागरिकांना येणाऱ्या अडचणी लक्षात घेऊन म्हाडाकडून दोन वेळा मुदतवाढ देण्यात आली होती. त्यानंतर निवडणूक आचारसंहिता लागू झाल्याने सोडत पुढे ढकलण्यात आली. सुरुवातीला डिसेंबरमध्ये सोडत होण्याची शक्यता होती; मात्र महापालिका निवडणुका जाहीर झाल्याने हा निर्णय लांबणीवर पडला.
सोडतीसाठी म्हाडाने राज्य निवडणूक आयोगाकडे परवानगी मागितली होती. मात्र, यामुळे मतदारांवर परिणाम होऊ शकतो, असे सांगत आयोगाने परवानगी नाकारली. अखेर जिल्हा परिषद निवडणुकांची आचारसंहिता संपल्यानंतर येत्या मंगळवारी सोडत घेण्याचा निर्णय झाला.
या सोडतीस नागरिकांकडून मोठा प्रतिसाद मिळाला असून, अनामत रकमेच्या स्वरूपात सुमारे 488 कोटी रुपये जमा झाले आहेत. सप्टेंबर 2025 पासून ही रक्कम म्हाडाकडेच अडकून असल्याने सोडत कधी होणार, याबाबत अर्जदारांकडून सतत विचारणा केली जात होती. आता मात्र ही प्रतीक्षा अखेर संपणार आहे.
56
घरबसल्या पाहता येणार सोडतीचे थेट प्रक्षेपण
अर्जदारांची गर्दी टाळण्यासाठी म्हाडाकडून सोडतीचे थेट ऑनलाईन प्रक्षेपण करण्यात येणार आहे. दुपारी 12 वाजल्यापासून म्हाडाच्या अधिकृत YouTube चॅनेलवर ही सोडत थेट पाहता येणार आहे. तसेच पात्र अर्जदारांना निकाल पाहण्यासाठीची लिंक त्यांच्या नोंदणीकृत मोबाईल क्रमांकावर SMS द्वारे पाठवण्यात आली आहे.
66
पुण्यात हक्काचं घर मिळवण्याची मोठी संधी
निवडणूक आचारसंहिता आणि तांत्रिक अडचणींमुळे दोन वेळा पुढे ढकललेली ही प्रक्रिया आता अंतिम टप्प्यात आली असून, पुणेकरांच्या घराच्या स्वप्नाला आकार देण्याचा क्षण जवळ आला आहे.
